Монгол Улсын Их Хурлын 2024 оны ээлжит сонгуульд оролцох улс төрийн 27 нам, 2 эвсэл мөрийн хөтөлбөрт дүгнэлт гаргуулахаар Үндэсний аудитын газарт ирүүлсэн. Мөрийн хөтөлбөрийн хяналт, хэрэгжилтийн талаар мэдээлэл өгөв.
Үндэсний аудитын газрын Санхүү-Нийцлийн аудитын газрын захирал, тэргүүлэх аудитор Ц.Наранчимэг
“Үндэсний аудитын газарт хүргүүлсэн мөрийн хөтөлбөрийг хянаж дүгнэж, холбогдох хуулийн шаардлага хангаагүй тохиолдолд 2024 оны дөрөвдүгээр сарын 10-ны өдрийн дотор тухайн нам, эвсэлд мэдэгддэг. Энэ дагуу бид улс төрийн намуудад эхний мэдэгдлээ хүргүүлсэн байгаа. 27 нам, 2 эвслийн мөрийн хөтөлбөр хуулийн шаардлага хангаагүй гэсэн эхний дүгнэлт гарсан учраас тухайн нам, эвсэлд мэдэгдэж дөрөвдүгээр сарын 12-17-ны өдрүүдэд зөвлөмж өгч, алдаа зөрчлийг засуулан авна.
Аудитын газраас намуудын мөрийн хөтөлбөрийг хууль тогтоомжид нийцсэн эсэхийг хянаж дүгнэдэг.
УИХ-ын сонгуулийн тухай хуулийн 38.3.Сонгуулийн мөрийн хөтөлбөрт дараах зүйлийг тусгахыг хориглодог.
- 38.3.1.мөнгө, эд хөрөнгө, эд хөрөнгөтэй холбоотой эрх олгох;
- 38.3.2.уул уурхай, газрын тос, эрдэс баялгийн болон бусад салбарын орлого, түүнчлэн улс, орон нутгийн төсвөөс иргэдэд аливаа хишиг, хувь, тэдгээртэй адилтгах бусад зүйл хүртээх;
- 38.3.3.зээлийн болон бусад өр төлбөрийг хүчингүйд тооцох, хөрвүүлэх;
- 38.3.4.иргэдэд үнэ төлбөргүй, эсхүл хямдралтай үнээр үйлчилгээ үзүүлэх;
- 38.3.5.ажлын байранд зуучлах, ажилд оруулах;
- 38.3.6.улсын болон орон нутгийн төсвийн хөрөнгийг иргэдэд тараан олгох, шууд зарцуулахтай холбогдсон асуудлыг хориглодог.
