Стив Жобс 2010 онд анхны iPad-ийг танилцуулж байхдаа тус төхөөрөмж хувийн компьютерийн дараах эрин үеийг эхлүүлнэ гэж байв.
Гэхдээ түүнээс хойших жилүүдэд iPad-д хэдий олон өөрчлөлт, шинэчлэлт хийсэн ч Apple компани хэрэглэгчдэд зөөврийн компьютероосоо татгалзах сэдлийг өгч чадаагүй хэвээр байна.
Харин АНУ-ын цагаар Мягмар гарагт танилцуулагдах шинэ iPad-ийг жинхэнэ утгаараа зөөврийн компьютерийг орлох бүтээгдэхүүн болгоход Apple бүгдийг зориулсан байх магадлалтай гэж шинжээчид үзэж байна.
iPad-ийн шинэ хувилбаруудын хамгийн том өөрчлөлт нь процессорууд байх төлөвтэй.
Тухайлбал шинэ iPad Air нь M2 чипээр, харин iPad Pro Apple-ийн ид хөгжүүлж буй хиймэл оюунт функцүүдэд зориулагдсан хүчирхэг M4 чипээр тоноглогдсон байх хүлээлттэй байна.
Мягмар гарагийн танилцуулах арга хэмжээний дараа iPad-ийн “гэр бүл” хэрхэн өөрчлөгдөх магадлалтайг харвал:
⚫ iPad (есдүгээр үе) нь 10.2 инчийн дэлгэц, голын товчлууртай
⚫ iPad (аравдугаар үе) нь 10.9 инчийн дэлгэцтэй, голын товчлуургүй
⚫ iPad mini (зургаадугаар үе) нь 8.3 инчийн дэлгэцтэй
⚫ iPad Air нь 11 инч болон 12.9 инчийн хоёр хувилбартай, M2 чиптэй
⚫ iPad Pro нь 11 инч болон 12.9 инчийн хоёр хувилбартай, M4 чиптэй
