Шинээр бүрдсэн Нийслэлийн иргэдийн төлөөгчдийн хурал анхдугаар хуралдаанаа хийж, Хурлын даргаар А.Баярыг сонгох асуудлыг хэлэлцэж, 86.7 хувийн саналаар дэмжлээ.
А.Баяр гэж хэн бэ
А.Баяр нь 1985 онд Улаанбаатар хотод төрсөн, үхэр жилтэй. Нийслэлийн 10 жилийн гадаад хэлний сургалттай 18-р дунд сургуулийг 2002 онд төгссөн. 2008 онд Анагаах ухааны их сургуулийг хүний их эмч мэргэжлээр төгссөн.
-
2010 онд Хартфорд Их Сургуулийг Бизнесийн удирдлага, маркетингийн чиглэлээр төгссөн. 2020 онд Монгол Улсын Их Сургуулийн Хууль зүйн сургуулийг Эрх зүйч мэргэжлээр тус тус суралцаж төгссөн.
-
2004 оны Анагаах Ухааны Их сургуулийн шилдэг оюутан,
-
2006 оны Анагаах Ухааны Их Сургуулийн оюутны зөвлөлийн дарга,
-
2010 онд “Хүрэл Интернэйшнл Транс” компанийн Гүйцэтгэх захирал,
-
2011 онд “Цаст Фүүдс” компанийн Гүйцэтгэх захирал,
-
2013 оноос өөрийн үүсгэн байгуулсан Биг Виг компанийн захирлаар ажиллаж байгаа шинэ залуу үеийн манлайлал, залуу боловсон хүчин,
-
2015 оноос Амарбаясгалангийн Баяр нь Нийгмийн ардчилал Монголын залуучуудын холбооны Удирдах зөвлөлийн гишүүн,
-
2016 оноос Баянзүрх дүүргийн Иргэдийн Хурлын төлөөлөгчөөр сонгогдон ажиллаж байна.
-
2019 оноос Нийгмийн ардчилал Монголын залуучуудын холбооны дэд ерөнхийлөгчөөр,
-
2020 оноос Баянзүрх дүүргийн Иргэдийн төлөөлөгчдийн хурлын даргаар сонгогдож ажилласан.
НИТХ-ын даргаар сонгогдож, тамгаа гардан авсныхаа дараа А.Баяр үг хэллээ.
Тэрээр “Юуны түрүүнд итгэл үзүүлэн улс эх орныхоо төлөө чин сэтгэлээсээ ажиллах боломж олгон, нэр дэвшүүлсэн хотын намын хорооны дарга Х.Нямбаатар, Баянзүрх дүүргийн МАН-ын дарга, Улаанбаатар хотын хөгжлийн бодлого эрхэлсэн түр хорооны дарга, УИХ-ыг гишүүн Э.Бат-Амгалан болон Ерөнхий сайд, хотын удирдах зөвлөлийн гишүүд, хотын намын хорооны тэргүүлэгчид, гишүүд, журмын олон нөхдөд, эрхэм төлөөлөгч та бүхэндээ баярласан сэтгэгдлээ илэрхийлье.
Иргэдийн төлөөлөгч гэдэг бол иргэн төрийн харилцах гүүр. Тиймээс Нийслэлийн захирагч бөгөөд Улаанбаатар хотын даргын хийж хэрэгжүүлэх бодлого, хэтийн төлөв, алсын хараад нийцүүлэн иргэд, олон түмнийхээ дуу хоолойг шигтгэн тууштай, дэмжиж хамтран ажиллахын зэрэгцээ үе үеийн залгамж халааг алдагдуулахгүй авч явах зарчмыг баримтлах болно.
НИТХ, бодлогын байгууллага, цаашид бодлого тодорхойлогч байгууллагын үндсэн үүргээрээ ажиллах учиртай. Сайн бодлогын үр дүнд сайн бүтээн байгуулалт өрнөж, ажлын байр, амьдрах орчин, аюулгүй байдал дагаад сайжирдаг билээ.
385 жилийн түүхэн замналыг туулж 28 удаа нүүдэлсээр тунгалаг туул, сэрүүн сэлбийн хөвөөнд суурьшсан их хотынхоо бүтээн байгуулалт, хөгжил цэцэглэлтийг цаашид улам хөгжүүлэхийн тулд бидэнд сайн бодлого тодорхойлох зайлшгүй хэрэгцээтэй юм. Өдрөөс өдөрт өсөн нэмэгдэж байгаа хотыг цаашид хөгжүүлэхийн тулд бидэнд хөрөнгө оруулалт, түүнийг бэлдсэн сайн хөрс зайлшгүй шаардлагатай.
Аливаа том ажилд алд дэлэм дэмжлэг ч хэрэг болдог учраас нийслэл хотынхоо өнөр бүлийг илүү сайхан маргаашид хүргэхийн тулд гаднын хөрөнгө оруулалтын олон эх үүсвэрийг ухаалгаар ашиглах нь зүйтэй юм.
Сайтар бэлдсэн хөрсөнд сайн үр шим ургадгийн адилаар нийслэлд хөрөнгө оруулалтын орчныг таатай болгож, олон талт эх сурвалжаас хөрөнгө мөнгө татах, үе үеийн төлөөлөгчдийн хийж хэрэгжүүлж ирсэн ажлыг улам эрчтэй үргэлжлүүлэхийн тулд үүнийг хийх ёстой ажлуудын эхний жагсаалтад багтааж байгаа юм.
Улаанбаатар хотын алсын хараа, хэтийн зорилт 2040 он хүртэл хэрэгжүүлэх шинэ сэргэлт шинэ Улаанбаатар хөтөлбөрийг зоригтой, зорилготой, шинэ үеийн лидер хотын засаг даргатайгаа хамтдаа хэрэгжүүлж, иргэн төвтэй, эдийн засгийн чадамжтай Нийслэл хотыг бүтээхийн тулд хамтын нөхөрлөл, олон улсын дэмжлэг, гадаад харилцааны шинэ эх үүсвэрүүдийг татан ажиллахыг уриалж байна. Нэг ч иргэний эрх ашгийг гээхгүй ажиллах зарчмын хүрээнд эрхэм төлөөлөгч нартайгаа хамтран их сэргэлтийг хийх ажлыг эрчимжүүлэн ажиллаж, зөв Монголын төлөө чин сэтгэлээ зориулан НИТХ-ын төлөөлөгчид бид Засаг даргын хамт эв нэгдэлтэйгээр ажиллах болно гэдгээ хариуцлагатайгаар мэдэгдэж байна.
