Ази Номхон далайн Итгэмжлэлийн хамтын ажиллагааны байгууллага (APAC) дөрвөн жилд нэг удаа жинхэнэ гишүүн улс орнуудынхаа Итгэмжлэлийн тогтолцоо, байгууллагын чадавх, үйл ажиллагаанд ижил түвшний үнэлгээ хийдэг.
Уг байгууллагаас энэ оны тавдугаар сард манай улсын Итгэмжлэлийн байгууллагад ижил түвшний тус үнэлгээг хийсэн. Үнэлгээний ажлын хэсэгт Австрали, Шинэ Зеланд, БНХАУ, Канад улсын Итгэмжлэлийн байгууллагын төлөөлөл оролцсон байна. Уг ажлын хэсгийн үнэлгээний дүнг APAC-ийн Удирдах зөвлөл арваннэгдүгээр сарын 22-ний өдрийн хурлаар эцэслэн хэлэлцжээ.
Хуралд 61 улс оролцсоноос 55 нь буюу 90 хувийн дэмжсэн саналаар манай улсын Итгэмжлэлийн чадавхийг бүрэн хүлээн зөвшөөрлөө.
Олон улсын Итгэмжлэлийн хамтын ажиллагааны байгууллага(ILAC, IAF)-ын харилцан хүлээн зөвшөөрөх хэлэлцээрт (MRA, MLA) нэгдэж, чадамжаа хүлээн зөвшөөрүүлсэнээр Итгэмжлэгдсэн сорилт, хэмжил зүйн лаборатори, техникийн хяналт болон баталгаажуулалтын байгууллагын үр дүнг дэлхийн 140 гаруй улс хүлээн зөвшөөрөх эрх үүсдэг. Өөрөөр хэлбэл, Монгол Улсад үйлдвэрлэсэн бараа бүтээгдэхүүнийг олон улсын зах зээлд гаргахад дахин сорилт шинжилгээ хийхгүйгээр шууд хүлээн зөвшөөрнө гэсэн үг юм.
Жишээ нь, бид хүнсний бүтээгдэхүүнээ БНХАУ руу экспортлоход Монголын Итгэмжлэгдсэн лабораторийн сорилт, шинжилгээний дүнд БНХАУ давтан сорилт шинжилгээ хийхгүй болно. Ингэснээр бизнес эрхлэгчдэд хөрөнгө санхүүгийн болон цаг хугацааны хувьд маш том хэмнэлт гарна.
Итгэмжлэл нь худалдааны аливаа саад тотгорыг багасгах, худалдааг хөнгөвчлөх, тухайн бараа бүтээгдэхүүнд хэрэглэгчийн итгэх итгэлийг нэмэгдүүлэх зэрэг ихээхэн ач холбогдолтой. Итгэмжлэгдсэн л бол тухайн бараа бүтээгдэхүүн, ажил үйлчилгээнд бүрэн итгэж болно гэсэн үг юм.
Цаашлаад Итгэмжлэлээр дамжуулан стандартын хэрэгжилт сайжрах, ард иргэд эрүүл аюулгүй бараа бүтээгдэхүүн хэрэглэх нөхцөл бүрдэнэ.
Тиймээс энэ онд багтааж Монгол Улсын Итгэмжлэлийн хамрах хүрээг гурваас доошгүй чиглэлээр өргөжүүлэх, ирэх онд таваас доошгүй чиглэлээр хүрээгээ өргөтгөн Олон улсын Итгэмжлэлийн байгууллагаар хүлээн зөвшөөрүүлэхийг Үндэсний Итгэмжлэлийн байгууллагад үүрэг болголоо.
Түүнчлэн олон улсад өргөн хэрэглэгдэж байгаа ногоон стандартуудыг нэвтрүүлэх чиглэлээр онцгойлон анхаарч ажиллах шаардлага бий. Иймд Монгол Улсын Шадар сайд С.Амарсайхан хил дамнасан худалдаа, үйлчилгээний асуудалд цаашид ч онцгой анхаарч ажиллана гэж мэдэгдлээ.
