Нийслэлд 2030 он гэхэд метро, дүүжин тээвэр, LRT, BRT, тойрог хурдны зам, туулын хурдны замын төслүүдийг ашиглалтад оруулах зорилт тавьсан. Тэгвэл энэ төслүүд заасан хугацаанд бүгд хэрэгжиж чадах эсэх талаар төсөл хэрэгжүүлэгчид /2025.01.16/ мэдээлэл өглөө.
Тодруулбал Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжээс, төслүүдийг хэрэгжүүлэх он цагийн дагуу судалгаа, шинжилгээ, тооцоолол, ажлуудыг хийж бэлтгэл ажлуудыг хангаж байгаа. Дүүжин тээвэртэй холбогдох судалгааг хийж, шаардлагатай техник хэрэгслийг татан авах талаар холбогдох улс орнуудын нийлүүлэгчидтэй уулзсан. Үнэ ханш болон зээлийн тухайд Монголын талд ашигтай байхаар харж байгаа. Дүүжин тээврээр зорчих зах зээлийн үнийн тооцооллыг хийгээд үзэхэд 1500 төгрөг байна. Гэхдээ 2600 төгрөгөөр тарифыг тогтоож байж бизнесийн ашиг, алдагдлаа нөхөөд явах боломжтой. Одоогоор дүүжин тээврээр зорчих үнэ эцэслэгдээгүй. Улирал тутамд л бид ТЭЗҮ дээрээ анализ хийж, үнийн хэлбэлзлийг тооцоолж байгаа. Эцсийн дүндээ бол байж болох хамгийн хямд үнээр л иргэд зорчих боломжийг бүрдүүлнэ. Хамгийн гол нь иргэн бүр суух боломжтой, төлж чадах тарифыг л тогтооно.
Харин туулын хурдны замын тухайд инженерийн шийдлийн хувьд авч үзвэл хоёр жилийн хугацаанд барих боломжтой. Тус замын байгаль орчинд нөлөөлөх нөлөөлөл судалгаагаар харагдана. Голын голдирол, одоо байгаа ногоон байгууламж, ойр орчинд нь амьдарч байгаа ан амьтны нүүдэл гэхчлэн олон асуудал бий. Томоохон төслүүдийг хэрэгжүүлэхийн тулд бид Байгаль орчин, уур амьсгалын өөрчлөлтийн яамтай хамтарч ажиллаж байгаа. Ажлын хэсэгт төлөөллүүд орж, чиглэл бүрийн асуудлыг авч хэлэлцэж байгаа.
Одоо бид хэрэгжиж байгаа төслүүдийнхээ явцыг иргэд олон нийтэд ойлгомжтой байлгах үүднээс ipiu.mn сайтад дэлгэрэнгүй харуулахаар төлөвлөж байгаа. 14 хоногийн дараа хөгжүүлэлт дуусах учраас хүссэн иргэд төслүүдийн ерөнхий мэдээллийг орж харах боломжтой. Тус цахим хуудсаар иргэд төслийн мэдээлэл, худалдан авах ажлын явц, хэрэгжилт эхэлсэн эсэх гээд бүх мэдээллийг авч болно гэлээ.
-ДҮҮЖИН ТЭЭВРИЙГ ЭХНИЙ ЗУРГААН САР ЗОРЧИГЧГҮЙ ТУРШИНА –
Өнгөрсөн оны арванхоёрдугаар сард дүүжин тээврийн явцын талаар хотын дарга Х.Нямбаатар мэдээлэл өгөхдөө “Дүүжин тээврийн төсөл үргэлжилж байгаа. Энэ 2018 онд эхэлсэн төсөл. Энэ төслийн тоног төхөөрөмж нь Франц улсынх байх ёстой. Тоног төхөөрөмжүүд эхнээсээ Замын-Үүдийн боомтоор орж ирж байгаа. Ирэх оны зургадугаар сард үндсэн цамхаг, кабенаа угсрах ажлаа хийж дуусна.
Энэ дүрмээрээ бол угсралт хийснээс хойш бүтэн зургаан сар, зорчигч суулгалгүй туршилтын тээвэрлэлт хийх ёстой.
Бид энэ цаг хугацааг нь наашлуулж, ирэх оны есдүгээр сарын 1-нээс өмнө Улсын комисс хүлээж авах шаардлагыг тавьж байгаа. Нийслэлийн зүгээс зөвшилцөх бүх ажлаа хийж дуусгасан. Одоо газар чөлөөлөлтийн ажил “Хархорин” худалдааны төвийн баруун талд байдаг “Барс-2″ худалдааны төвийн зарим хэсгийг буулгана.
Мөн хажуугийн нэг объектыг буулгана. Бид өмчлөгч иргэдтэй тохиролцсон байгаа. Яармагийн зам дээр оргил ачааллын үед 90-95 мянган машин зорчиж байна. Энэ том урсгалыг сааруулах зорилготойгоор энэ төслийг хийж байгаа” гэж байсан юм.
