Дээрхийн гэгээн 14 дүгээр Далай лам шинэ гаргасан номдоо өөрийнх нь хойд дүр Хятадаас гадна “чөлөөт ертөнцөд” төрнө гэж бичжээ.
Түүний хувьд хойд дүрээ Хятадаас гадуур төрнө гэж анх удаа хэлж буй нь энэ юм.
Өмнө нь зөвхөн Төвөдөөс гадуур, магадгүй Энэтхэгт мэндэлнэ хэмээн дурдаж байв.
“Дахин төрсний гол зорилго нь өмнөх Далай ламын үйл хэргийг үргэлжлүүлэх явдал тул шинэ Далай лам чөлөөт ертөнцөд төрнө. Ингэснээр Төвөдийн ард түмний хүслийг илэрхийлэгч, Буддизмын оюун санааны удирдагч, бүх нийтийн энэрэнгүй сэтгэлийн дууч байх уламжлалт үүргээ үргэлжлүүлнэ” гэжээ.
14 дүгээр Далай лам 1959 онд буюу 23 настайдаа Мао Зэдуны коммунист дэглэмийн эсрэг бослого бүтэлгүйтсэний дараа олон мянган төвөд хүний хамтаар Энэтхэг рүү дүрвэсэн.
Далай ламын хойд дүрийг Бээжингээс сонгоно гэж мэдэгддэг ч Хятадаас томилсон хэнийг ч төвөдүүд хүлээн зөвшөөрөхгүй гэдгийг Далай лам удаа дараа онцолж байв. 1989 онд Нобелийн энх тайвны шагнал хүртсэн Далай ламыг Хятад улс “салан тусгаарлагч” хэмээн тодорхойлдог.
Өдгөө 89 настай түүнийг өнгөрсөн жил өвдөгний хагалгаанд орсны дараа дэмжигчид нь эрүүл мэндэд нь ихээхэн санаа зовж эхэлсэн.
Гэсэн ч тэрбээр өнгөрсөн арванхоёрдугаар сард өгсөн ярилцлагадаа өөрийгөө 110 наслах боломжтой хэмээжээ. Тэрбээр 90 насныхаа ойгоор өөрийн хойд дүрийг тодруулна хэмээн дурдсан байдаг.
Эх сурвалж: Reuters
