УИХ-ын Эдийн засгийн байнгын хорооны өнөөдрийн /2025.04.01/ хуралдаанаар Монголбанкны хяналтын зөвлөлийн үйл ажиллагааны талаарх мэдээллийг сонсох үеэр зээлийн хүүг бууруулах асуудлаар төв банк хэрхэн ажиллаж байгаа талаарх асуудал хөндөгдлөө.
Тодруулбал, УИХ-ын гишүүн О.Батнайрамдал “Зээлийн хүүг бууруулах ганц боломж нь гадаадын хөрөнгө оруулалттай банк оруулж ирэх явдал. Энэ асуудал дээр төв банк хэрхэн ажиллаж байна вэ” гэдгийг тодруулав.
Монголбанкны дэд ерөнхийлөгч Г.Энхтайван “Гадаадын банк нь өөрөө эх үүсвэрийн зардлыг тодорхой хэмжээнд бууруулаад арилжааны банкуудын өрсөлдөөныг тэтгэж, зээлийн хүүг буруулж, инфляцыг нам дор төвшинд барих, макро эдийн засгийн тогтвортой байдалд эерэг нөлөөтэй гэж гишүүн хэллээ. Тантай 100 хувь санал нэг байна. Төв банкны хувьд гадаадын банк оруулж ирэх шат дараатай арга хэмжээг удаа дараа авч байгаа.
Яг одоогийн байдлаар төв банкинд Монголд орж ирэхээр хүсэлтээ өгчихсөн гадаадын банк алга байна.
Төв банкны удирдлага удаа дараа холбогдох улсуудад очиж, Монгол Улсын банк санхүүгийн салбар, зохицуулалт, санхүүгийн салбарт үйл ажиллагаа эрхлэх ямар боломжтой байх талаар дэлгэрэнгүй танилцуулга хийгээд явж байгаа. Гадаадын банк оруулж ирэхэд амаргүй байна.
Урьд нь Монгол Улсад эдийн засгийн суурь нөхцөл байдлаасаа хамаараад гадаадын 6-7 арилжааны банкны төлөөлөгчийн газар ажиллаж байсан, одоо хоёр л банк байна. Төв банкны зүгээс гадаадын банк оруулж ирэхэд хэд хэдэн бодлогын арга хэмжээ авч байгаа. Банкны салбарын шинэтгэлийн хүрээнд арилжааны банкууд системийн нөлөө бүхий банкууд нээлттэй, арилжааны бусад банкнууд хаалттай хүрээнд хувьцаат компани болсон. Энэ хүрээнд арилжааны банкууд өөрсдийн эзэмшлийн хувийг гадаад улсын банк санхүүгийн байгууллагад санал болгож, гадаадын хөрөнгө оруулалтыг татах чиглэлээр үйл ажиллагаа эрхлээд явж байгаа.
Хэд хэдэн банкны зүгээс Лондон, Нью-Йоркийн хөрөнгийн бирж дээр гарч, тухайн улсын хөрөнгийн биржээр дамжуулж, гадаадын хөрөнгө оруулалтыг оруулах, гадны банкинд хувь эзэмшлээ худалдах замаар гадны банк оруулах чиглэлээр ажиллаж байна гэдгээ төв банкинд мэдэгдсэн.
Төв банкны зүгээс арилжааны банкинд гадаадын банк санхүүгийн байгууллагад хувь эзэмшээд явах бодлогыг нээлттэй дэмжиж байгаа. Энэ нь нэг талаасаа арилжааны банкны хувьцаа эзэмшигч өөрийн эд хөрөнгийг хэрхэн үнэлж, ямар хэлбэрээр шилжүүлэх вэ гэдэг сонголтын асуудал байгаа. Төв банкны зүгээс бодлогын дэмжлэг үзүүлээд, гадаадын банк ажиллах боломж байгаа гэдэг талаар зөвлөмж өгөх чиглэлээр ажиллаж байна” гэлээ.
