ОХУ энэ хаврын цэрэг татлагын хүрээнд 18-30 насны 160 мянган эрэгтэйд зарлан хүргүүлжээ. Энэ нь 2011 оноос хойш анх удаа ийм олон цэргийг зарлан дуудсан явдал болж байна. Армийнхаа хэмжээг тэлэх амбиц дор Путин нийт алба хаагчдын тоог 2.39 сая, тэр дундаа идэвхтэй алба хаагчдын тоог 1.5 саяд хүргэх ёстой гэж мэдэгдсэн билээ. Энэ тоонд хүрэхийн тулд ОХУ ирэх гурван жилийн хугацаанд алба хаагчдынхаа тоог 180 мянгаар нэмэх ёстой болох юм.
“Шинэ цэргүүдийг Оросын цэргийн тусгай ажиллагааны төлөө Украинд илгээхгүй” гэж армийн дэд адмирал Владимир Цимлянский хэлжээ.
ОХУ жил бүрийн хавар, намрын улиралд хугацаат цэргийн албанд цэрэг татдаг. Энэ хаврын тухайд 2024 оны мөн үеэс 10 мянгаар олон цэрэг татах гэж байна. Мөн цэрэгт татагдах залуусын насны хязгаар 27 байсныг өнгөрсөн оны эхэн үеэс 30 болгон нэмэгдүүлсэн. Залууст цэргийн зарланг шуудан болон төрийн үйлчилгээний цахим хуудсаар дамжуулан хүргэх болно.
Гэвч орос залуус альтернатив иргэний алба буюу эрүүл мэнд, нийгмийн үйлчилгээ гэх мэт цэргийн үүргийг орлохуйц өөр алба сонгох байдлаар цэрэгт явахаас зайлсхийх болжээ. Тийм учраас эрх баригчид цэрэг татлагын уламжлалт арга барилыг давсан урьдчилан таамаглах аргагүй шинэ арга зам байнга хайх болсон. Үүнийг нэг төрлийн сугалаа мэт болсон гэдгийг хүний эрхийн хуульч Тимофей Васкин хэлжээ.
