Улсын Их Хурлын Эдийн засгийн байнгын хорооны хуралдаанаар Засгийн газраас 2025.05.16-нд өргөн мэдүүлсэн Стандартчилал, техникийн зохицуулалт, тохирлын үнэлгээний итгэмжлэлийн тухай хууль /Шинэчилсэн найруулга/-ийн төслийг хэлэлцэв.
Хууль санаачлагчийн илтгэлийг Улсын Их Хурлын гишүүн, Засгийн газрын гишүүн, Монгол Улсын Шадар сайд С.Амарсайхан танилцуулав.
Тэрээр “2017 онд баталсан хуульд стандартыг сонгон хэрэглэнэ гэсэн. Энэ нь иргэн, аж ахуйн нэгж, төрийн хяналтын байгууллага хооронд ойлголтын зөрүү үүсгэж улмаар хэрэгжилт хангалтгүй байх шалтгаан боллоо. Улмаар хүний амь нас, эрүүл мэнд, хүрээлэн буй орчинд ноцтой эрсдэл учруулж байгаа нь олон хүндрэл дагуулсан” гэв.
Манай Улсад өнөөдрийн байдлаар 6733 стандарт хүчин төгөлдөр байна. Гэвч тэдгээрийн хэрэгжилт сул, мөрдөх хэвшил, хэрэглээ, соёл сул, тогтолцоо бүрэн бүрдээгүй.
2022 онд Шадар сайдын тушаалаар хийсэн судалгаагаар 2000 гаруй стандартад дүн шинжилгээ хийхэд 20 гаруй хувь нь шаардлага хангаж, үлдсэн 80 хувийг нь шинэчлэх, олон улсын болон үндэсний стандартуудад нийцүүлж өөрчлөх шаардлагатай гэдэг дүгнэлт гарчээ.
Эрүүл мэнд, барилга, хүнс, аялал жуулчлал зэрэг стратегийн салбарууд төдийгүй олон улсын хөгжил дэвшлээс ч хоцрох, чанар аюулгүй байдлыг хангах чадамжгүй болох ноцтой аюул дагуулж байгааг онцлов.
Эрх зүйн орчныг шинэчлэх зайлшгүй үүссэн тул төслийг боловсруулсан гэв. Тохирлын үнэлгээ, итгэмжлэлийн тогтолцоонд гүнзгий доголдол үүссэн гэж дүгнэж байгаа аж. Тухайлбал, эрүүл мэндийн чиглэлээр үйл ажиллагаа явуулж байгаа 400 орчим лабораторийн 35 нь шаардлага хангаж, хүнсний лабораториудын 35 хувь нь итгэмжлэгдсэн байна.
Иймд стандартын эрх зүйн орчныг шинэчлэх шаардлагыг олон талаас нь судалж, 60 гаруй хэлэлцүүлэг зохион байгуулж, давхардсан тоогоор 20 мянган орчим оролцогчоос 17250 санал авч, тэдгээрийг хуулийн төсөлд тусгажээ.
