ТЭЦ-3 ДЦС–ын нэг турбинд өнгөрсөн 6-р сард том гэмтэл гарч, бүрэн зогсоод байгаа.
Тэгвэл турбины үйлдвэрлэж байсан дулааныг хэрхэн нөхөх талаар Эрчим хүчний сайд Б.Чойжилсүрэн дараах төлөвлөлт хийснээ танилцуулав.
Тэрбээр, ТЭЦ-3-ын 50МВт-ын генератор зогссон тул ийм хэмжээний чадлын дутагдал үүснэ. Үүнийг нөхөх шийдлийг Эрчим хүчний яам, Диспетчерийн үндэсний төвтэй зөвлөлдөн гаргаад байна. Эхнийх нь Бөөрөлжүүтийн цахилгаан станцын II блокийн 150 МВт-ын станцыг 2025 ондоо багтаан ашиглалтад оруулах зорилт тавин ажиллаж байна. Шуурхай ашиглалтад оруулахын тулд салбарын яамнаас бүх талын дэмжлэг үзүүлж байна.
Мөн Сэлэнгэ аймгийн төвд 35МВт-ын хоёр станц буюу нийт 70 МВт-ын хүчин чадалтай дулааны цахилгаан станц баригдаж эхэлсэн. Үүнийг мөн 12-р сард багтаан ашиглалтад оруулна. Завханы Тосонцэнгэлд 30 МВт-ын ДЦС-ын 22МВт нь ашиглалтад орно. Энэ гурван эх үүсвэрээр өссөн хэрэглээ болон сая дутагдсан 50МВт-ын эрчим хүчийг нөхөхөөр тооцоолон ажиллаж байна.
Бүр шаардлагатай бол БНХАУ-аас 80МВт-ыг эх үүсвэр импортлох гэрээ байгуулсан, техникийн холболтуудыг 9-р сардаа багтаан хийх юм. Тэгэхээр цахилгааны хувьд 2025-2026 оны өвлийн их ачааллыг төвийн бүсийн эрчим хүчний системээс даах шийдэл гарсан гэж болно.
Харин дулааны хувьд 50 МВт-ын трубо генератор нь гэмтсэн, зуух нь хэвийн учир дулаан, цахилгаан хослон үйлдвэрлэдэг горимоос нь салгаж, зуухнаас уур үйлдвэрлэн турбин руу оруулж цахилгааны эрчим хүч үйлдвэрлэж байсан.
Тэгвэл зуухны даралтыг буулган галлаж, зөвхөн дулаан дангаар үйлдвэрлэх горимд шилжүүлж 50 гига ккал-тай тэнцэх хэмжээний дулаан үйлдвэрлэнэ. Энэ ажлыг гүйцэтгэхэд 2025 оны улсын төсвийн тодотголд 8.5 тэрбум төгрөг тусгаж, зарцуулах эрхийг нь Засгийн газраас томилогдсон БЭТ-д шилжүүлсэн. Энэ ажил үргэлжилж байна, 11-р сарын 1-нээс өмнө ашиглалтад орно.
Цаана нь үлдэх 50 гига ккалыг Улаанбаатар хотын дулааны схемд өөрчлөлт оруулах замаар ТЭЦ-4 болон Амгалан ДЦС-д нэмэлтээр дулаан үйлдвэрлүүлэх шийдэл гаргасан. Ингэснээр Улаанбаатар хотод өнгөрсөн өвлийн их ачаалалтай тэнцэх хэмжээний дулааныг 2025-2026 оны өвөл үйлдвэрлэнэ гэсэн тооцоолол гаргасан гэв.
