Боловсролын сайдад хүргүүлсэн багш нарын цалингийн талаар шаардлагынхаа хариуг авахаар өнөөдөр багш нарын төлөөлөл Боловсролын яамны гадаа цугларсан байна.
Багш нарын зүгээс Боловсролын сайдад орон сууцны хүртээмж болон цалингийн бодитой нэмэгдлийн талаар шаардлагыг хүргүүлсэн байна. Уг шаардлагад дорвитой хариу өгөхгүй бол есдүгээр сараас ажил хаяна гэв.
Түүнчлэн Боловсролын яамнаас багш нарт танилцуулаад буй том тоонуудаа задалж нарийвчлан тайлбарлан бодит мэдээллээр хангах ёстой. Өндөр төсөв тавьсан ч задаргаа нь алга. Хичээл практик, эрүүл мэндийн зардал нь төсөвтөө суугаагүй байна гэдгийг багш нарын төлөөлөл хэллээ. Түүнчлэн багшийн чиглэлээр сурч байгаа оюутнуудыг дөрвөн жил үнэгүй сургаж байгааг болиулж тэр мөнгөө багш нарын цалинд зориулах ёстой гэв.
Боловсролын яам “Багшийн гүйцэтгэлийн үнэлгээний санхүүжилтийг улирал бүр буюу тухайн жилийн 3, 6, 9, 12-р саруудад санхүүжилт нь олгогддог учир өөр хугацаанд олгох боломжгүй байдаг. Мөн ур чадварын нэмэгдлийг хавтгайруулан олгож байгаа болон цэцэрлэгийн багшийн илүү цагийг үндсэн цалин руу нь шингээх саналыг ярилцаж байгаа” гэв.
Энэ талаар багш нарын төлөөлөл “Гүйцэтгэлийн үнэлгээ гэдэг бол худлаа. Гурван жил ажилласан багш нэгдүгээр түвшинд үнэлэгдэж гучин жил ажилласан багш нэг ч түвшинд үнэлэгдээгүй байх жишээтэй байна. Дандаа будилаантуулж үнэлж байна. Сайн багш нар Солонгос явж ажил хийж байна” зэргээр асуудлуудаа илэрхийлсэн юм. Гэсэн ч уулзалтын үеэр үймээн самуун үүссэн учир үр дүнтэй асуулт хариулт үргэлжилсэнгүй уулзалт дуусав.
