Ерөнхий сайдын тэргүүлдэг Хүүхдийн төлөө Үндэсний зөвлөлийн хуралдаанаар хүүхдийн эрхийг хамгаалах төрийн бус байгууллагуудын зүгээс хүүхдийн нас сэтгэхүй, үндэсний онцлогт тохирсон соён гэгээрүүлэх чиглэлийн контент дутмаг байгаа тухай хөндлөө.
Эл асуудалтай холбогдуулж Ерөнхий сайд Г.Занданшатар “Өргөн нэвтрүүлгийн хуулиар хүүхдийг соён гэгээрүүлэх контент хийгээгүй бол Өргөн нэвтрүүлгийн хөгжлийн сангаас олгох санхүүжилтийг бууруулах, зогсоох, тусгай зөвшөөрлийг нь цуцлах хүртэл арга хэмжээ авах эрх нь Харилцаа холбооны зохицуулах хороонд бий. Иймээс Өргөн нэвтрүүлгийн тухай хуулиар санхүүжилт авч байгаа телевизүүдийн контентод хяналт тавьж ажиллах шаардлагатай.
МҮОНРТ-ийн захирал Г.Гэрэл, Харилцаа холбооны зохицуулах хорооны дарга Г.Чинзориг, Мэдээлэл холбооны сүлжээ ТӨХК-ийн гүйцэтгэх захирал Б.Мөнхбат нарыг хуулиар хүлээсэн үүргийнхээ хүрээнд ажиллахыг чиглэл болгов.
Мөн Ерөнхий сайд Г.Занданшатар “Шүдээ яаж угаах вэ, гутлаа яаж үдэх вэ, хүнтэй яаж зөв харилцах вэ, ээж, аавыгаа яаж хүндлэх вэ гэдгийг англи контент, англи хүүхэлдэйн киногоор Монгол хүүхдийг англи хэлээр хэлд ортол нь зааж байна. Гэтэл МҮОНРТ Өргөн нэвтрүүлгийн сангаас авч байгаа мөнгө дэмжлэгийнхээ хэмжээнд хүрч ажиллаж чадахгүй байна. Хүчирхийллийн эсрэг, хүүхдийн эрхийн боловсрол олгох контент түлхүү боловсруулж ажиллах шаардлагатай” гэлээ.
Өргөн нэвтрүүлгийн тухай хуулиар МҮОНТ-ээс гадна нэр бүхий 18 телевизэд өрх бүр сар тутамд 2500 төгрөгийн хураамж төлдөг. Энэхүү хурамжаар жилд 20 гаруй тэрбум төгрөгийг татан авч, Монголын телевизүүдийн холбоо 18 гишүүн байгууллагадаа буюу телевизүүдэд тараадаг гэж үздэг. Эдгээр телевизүүдийн эзэд нь хөрөнгөтэй улстөрчид байдаг гэх шүүмжлэл сонсогдсоор ирсэн. Тэгвэл Засгийн газрын тэргүүнээс өгсөн үүрэг чиглэлийн дагуу хүүхдийн контент бүтээж, цацаж байгаа эсэхээс нь шалтгаалж, санхүүжилт өгөх эсэхэд холбогдох төрийн байгууллагууд хяналт тавих боллоо.
