Ерөнхий боловсролын сургуулийн сурагчдад зориулсан шинэ төрлийн нийтийн тээврийн UBcard картыг худалдаанд гаргахад бэлэн болжээ.
Тухайлбал, энэхүү үйлчилгээ сурагчдын дунд нэвтэрснээр өдөртөө гурван удаа дамжин суулт хийх боломжоор хангах аж.
Уг ажлын хүрээнд Нийтийн тээврийн бодлогын газрын дарга Д.Отгонжаргал, Нийслэлийн Боловсролын газрын дарга Б.Амартүвшин болон “Улаанбаатар смарт карт” ХХК, UBcard системийг хөгжүүлэгч компанийн төлөөлөлтэй уулзалтыг зохион байгуулжээ. Өнөөдрийн байдлаар 37 мянган сурагчийн картыг UBcard худалдаанд гаргахад бэлэн байгаа ч сурагчдад тараах асуудал хүндрэлтэй нөхцөл үүссэн байна.
Иймд Нийслэлийн Боловсролын газартай сурагчдын картыг хэрхэн сургууль, багшид хүндрэл учруулахгүйгээр сурагчдад олгох технологийн шийдлийн хайж хамтарсан уулзалт хийхээр болжээ.
Ерөнхий боловсролын сургуулийн сурагчид одоо 200 төгрөгөөр зорчдог бөгөөд хэрвээ картаа ашиглаж эхэлбэл өдөртөө 3-4 удаа дамжин суух эрх нь нээгдэж, нэг удаагийн зорчилтын үнэ 50 төгрөг болох боломжтой юм.
Нийслэлийн Засаг даргын зүгээс энэ ажлыг дэмжиж, сургууль болон багш нарыг урамшуулах арга хэмжээ авахад бэлэн гэдгээ илэрхийлсэн байдаг. Иймд энэ ажлыг ойрын хугацаанд ажил хэрэг болгохыг холбогдох хүмүүст үүрэг болгосон байна.
