Номхон далайн өмнөд хэсгийн цэнхэр уудамд нэгэн нууцлаг цэг оршино. Түүнийг Немо цэг хэмээн нэрлэдэг. Энэ бол дэлхий дээрх хамгийн алслагдсан, хамгийн эзгүй, хамгийн хүршгүй газар. Тийм ч учраас түүнд хамгийн ойр орших хүмүүс эх газарт бус, харин тэнгэрийн мандалд, дэлхийгээс 400 гаруй километрийн өндөрт эргэх Олон улсын сансрын станцын нисэгчид байдаг гэхээр үнэхээрийн онцгой.
“Далайн хүрэх боломжгүй туйл” хэмээн нэрлэгддэг энэ цэг нь гурван зүгт орших хамгийн ойрын эх газраас бараг 2,700 км зайтай. Түүнийг тойрон хэн ч амьдардаггүй Дюси арал, Моту Нуи, Махер арал зэрэг эзэнгүй арлууд л байх бөгөөд амьд амьтны бараа ч харагддаггүй.
Энэ эзгүйд орших цэгийг 1992 онд Хорват гаралтай Канадын зураг зүйн инженер Хрвойе Лукацелла тоон газрын зураг ашиглан нээн илрүүлсэн байна. Тэрбээр энэхүү нэрийг Жюль Вернийн алдарт “Далайн гүн рүү 20,000 бээр аялсан нь” зохиолд гардаг Капитан Немо-гийн нэрээр өгчээ. Харин “Nemo” гэдэг нь латинаар “Хэн ч биш”, “Хүн үгүй” гэсэн утгатай. Нэр нь хүртэл энэ газрыг илэрхийлэх шиг.
Хүн, амьдралын ямар ч ул мөргүй энэ эзгүй нутаг нь дэлхийн сансрын хөлгийн оршуулгын газар гэгдэх болсон. Тэнгэрийн оройгоос элэгдэж дууссан хиймэл дагуул, сансрын хөлгүүдийг зориуд энэ бүс рүү унагаадаг бөгөөд 2031 онд Олон улсын сансрын станц ч мөн энд сүүлчийн буултаа хийхээр төлөвлөгдсөн.
Харамсалтай нь хүн хүрээгүй ч, хүн төрөлхтний сүүдэр энд аль хэдийн шургажээ. Судлаачид ойролцоох далайн уснаас микропластик илрүүлсэн бөгөөд орших амьдрал нь өчүүхэн цөөн бактери, гүний хавчаар хязгаарлагддаг. Учир нь энэ бүс нь South Pacific Gyre буюу далайн эргэлтийн тэжээл багатай бүст багтдаг.
Немо цэг бол бидний мэдэх дэлхийн төгсгөл, шинжлэх ухааны төсөөлөл болон хүний ул мөр хэр хол, хэр гүнзгий нэвтэрч чадаж байгааг харуулсан чимээгүй гэрч юм.
Эх сурвалж: Wikipedia. Point Nemo. 2025.
