Монголын сурагч олон улсын тавцанд бахдам амжилт үзүүллээ.
Грекийн Тесалоники хотод зохион байгуулагдсан KGL Contest 2025 олон улсын англи хэлний олимпиадад Монгол Улсаа төлөөлөн оролцсон Цэлмэг Дижитал сургуулийн сурагч С.Мөрөн англи хэлний мэдлэг, яриа болон бичгийн чадвараараа бусад орны шилдэг өрсөлдөгчдийг ардаа орхиж, алтан медалийн эзэн боллоо. 🏅
KGL Contest нь 9–17 насны сурагчдын дунд жил бүр зохион байгуулагддаг, дэлхийн хэмжээний нэр хүндтэй англи хэлний олимпиад юм. Энэхүү уралдаан нь сурагчдын академик мэдлэгээс гадна бичгийн чадвар, бүтээлч сэтгэлгээ, харилцааны ур чадварыг цогцоор нь үнэлдгээрээ онцлогтой.
2025 онд дэлхийн 46 орны 82,000 гаруй сурагч KGL олимпиадад оролцсон бол Монгол Улсаас 768 сурагч ур чадвараа сорилоо. Тэдний дундаас С.Мөрөн A2 ангилалд гурван шатны шалгалтыг даван, дэлхийн аваргын алтан медалийг хүртсэн нь Монголын сурагчдын англи хэлний мэдлэг, боловсролын чанар дэлхийн түвшинд хүрснийг дахин нотоллоо.
Монгол дахь KGL-ийн албан ёсны зохион байгуулагч “АССУ Академи”-ийн төлөөлөл онцлохдоо:
“Манай сурагчдын англи хэлний түвшин жилээс жилд мэдэгдэхүйц сайжирч байна. KGL тэмцээн нь сурагчдад дэлхийн хэмжээнд өрсөлдөх урам зориг өгч, Монголын боловсролын чанар өсөж буйг тод харуулж байна. Энэ бол бидний бахархал юм” гэжээ.
KGL тэмцээн нь жил бүр улс орон даяар зохион байгуулагдаж, шалгарсан шилдэг сурагчид болон багш нарт Грек улсад болох дэлхийн финалд өрсөлдөх онцгой боломж олгодог. Олимпиад нь зөвхөн сурагчдын ур чадварыг үнэлэхээс гадна, багш нарт олон улсын хамт олонтой туршлага солилцох, боловсролын шинэ арга барилтай танилцах ховор боломжийг олгодог гэдгээрээ онцлог.
📍 KGL олимпиадын тухай
KGL Contest нь 9–17 насны сурагчдын англи хэлний түвшинг олон улсын жишгээр үнэлэх зорилготой тэмцээн юм. Олимпиадын эхний хоёр шат Монгол Улсад зохион байгуулагдаж, шилдэг оролцогчид Грек улсад болох Дэлхийн финалд оролцдог.
