УИХ-ын чуулганы хуралдаан үргэлжилж байна.
Хуралдаанаар УИХ-ын гишүүн Л.Оюун-Эрдэнэ нарын 33 гишүүнээс аравдугаар сарын 6-ны өдөр УИХ-д өргөн мэдүүлсэн“Хянан шалгах түр хороо байгуулах тухай” УИХ-ын тогтоолын төслийг хэлэлцэж байна.
УИХ-ын гишүүн Ж.Баярмаа “Та таван жил ажиллахдаа шалгахгүй юу хийж байсан юм бэ. Аль эрт шалгаад учрыг нь олчихгүй яагаа вэ. Бид сүүлийн нэг жил “Ухаа худаг”-ыг шалгаж байна уу гэж асуудаг л байсан. Миний санаж байгаагаар та долоо хоног бүр л “Ухаа худаг”-ын захиралтай уулзаад суудаг л байсан шүү дээ.
Нүүрсний биржийн үнэ хэд байгаа юм бол?. Яагаад 120 ам.доллароор зарагдаж байсан нүүрс 50 ам.доллар болсныг яаралтай шалгах хэрэгтэй” гэв.
УИХ-ын гишүүн Л.Оюун-Эрдэнэ “Харбины гэрээг шалгахыг дэмжиж байгаа. Үүнтэй холбоотой асуудлыг ярьж байгаа учраас Гашуунсухайт, Ганцмодтой холбоотой түүхийг сайн судалбал танай намын хоёр Ерөнхийлөгчтэй холбоотой асуудал болж хувирдаг шүү. Ц.Элбэгдорж Ерөнхийлөгчийн үед гэрээ хийсэн, Х.Баттулга Ерөнхийлөгчийн үед өргөн, нарийн цариг болгосон. Мухар төмөр зам тавьчихсан яаж холбох вэ гэдэг л асуудлыг ярьсан” гэлээ.
