Нийслэлийн төсөв, төрийн байгууллагын бүтэц бүрэлдэхүүнийг цомхон болгож, давхардсан чиг үүргийг цэгцлэх ажил үргэлжилж байна.
Энэ хүрээнд өнгөрсөн онд нийслэлийн Улсын бүртгэлийн газар болон Хүүхэд, гэр бүлийн хөгжил, хамгааллын газрыг Засгийн газрын шийдвэрээр татан буулгасан бөгөөд эдгээр байгууллага татан буугдсанаар үйл ажиллагааны доголдол гараагүй, дүүргүүд үйлчилгээнийхээ тасралтгүй байдлыг ханган ажиллаж байгаа гэж хотын дарга Х.Нямбаатар мэдээллээ.
Тэрбээр, нийслэлийн удирдах ажилтнуудын шуурхай зөвлөгөөний үеэр ирэх онд чиг үүргийн давхардалтай хоёр байгууллагыг дахин татан буулгахаар төлөвлөж буйгаа хэлэв. Тодруулбал, нийслэлийн Эрүүл мэндийн газар болон Нийтийн тээврийн бодлогын газрыг татан буулгах ажлыг эхлүүлэхээр болжээ.
Хотын даргын хэлснээр, эрүүл мэндийн салбарт үйлчилгээ үзүүлдэг байгууллагуудыг өөрсдийгөө санхүүжүүлэх чадамжтай, чанараар өрсөлддөг тогтолцоо руу шилжүүлэх шаардлагатай болсон. Тиймээс өрхийн эрүүл мэндийн төвүүдийг цөөн тоогоор нь нэгтгэж, төсөв, хүний нөөц, техник тоног төхөөрөмжийн хувьд илүү чадварлаг болгохоор зорьж байна. Ингэснээр иргэдэд үзүүлэх эрүүл мэндийн үйлчилгээний чанар, хүртээмж сайжирна гэж үзэж байгаа юм.
Мөн нийслэлийн Нийтийн тээврийн бодлогын газрыг татан буулгаж, хүн амын төвлөрөл ихтэй бүсүүдэд автобусны зогсоол, үйлчилгээний төв барьж, үл хөдлөх хөрөнгийн хөгжүүлэлт болон түрээсийн орлогоор санхүүждэг зарчимд шилжихээр төлөвлөжээ.
Хуулийн этгээдийг татан буулгахдаа Хуулийн этгээдийн улсын бүртгэлийн тухай хуулийн дагуу дараах дарааллаар ажилладаг.
Үүнд:
-
Татан буулгасан тухайгаа улсын бүртгэлийн байгууллагад мэдэгдэх
-
Татан буулгахтай холбоотой баримт бичгийг бүрдүүлэх
-
Татан буулгасныг улсын бүртгэлд бүртгүүлэх
-
Улсын бүртгэлээс хасуулах
Ийнхүү нийслэл төрийн байгууллагын бүтцийг үе шаттай цомхон болгож, төсвийн зарцуулалтыг оновчтой болгох өөрчлөлтүүд ирэх онд ч үргэлжлэхээр байна.
