Нийслэлийн Онцгой байдлын газраас гал түймрийн нөхцөл байдал, 2025.12.12-ны өдөр Хан-Уул дүүргийн 20 дугаар хороонд гарсан гал түймрийн талаар мэдээлэл хийлээ.
Нийслэлийн онцгой байдлын газар 2025 онд 14 удаагийн төлөвлөгөөт болон төлөвлөгөөт бус хяналт шалгалтын удирдамж боловсруулж, 4158 объектыг хамруулжээ. Шалгалтын явцад 20644 зөрчлийг илрүүлж 14 мянгыг нь газар дээр нь арилгуулсан аж. Нийслэлийн хэмжээнд үйл ажиллагаа явуулж байгаа аж ахуй нэгж байгууллагын 80 хувьд нь гал түймэр унтраах улсын байцаагч нар эрх зүйн бичиг баримт өгч ажиллажээ.
Нийслэлийн Онцгой байдлын газрын Гал түймэртэй тэмцэх хэлтсийн барилгын зураг төслийн хяналтын ахлах байцаагч, дэд хурандаа Ж.Хүдэрчулуун хэлэхдээ, Онцгой байдлын ерөнхий газраас хяналт шалгалтыг зохион байгуулж байгаа боловч зарим нэг байгууллагын хараа хяналтгүй,хайхрамжгүй байдлаас үүдэн галт түймрийн дуудлага гарч байна.
Өнөөдрийн байдлаар нийслэлийн хэмжээнд 2425 удаагийн галт түймэр гарсан. Энэ онд Big худалдааны төв, Од групп, Хан-Уул дүүргийн 20 дугаар хороонд баригдаж буй барилга гэх томоон худалдааны төвд гал гарлаа.
Аж ахуй нэгж байгууллагууд шинээр баригдаж байгаа болон дулаалгад ашиглах материалдаа шатдаггүй материалаар сонгох ёстой. Цэнхэр өнгөтэй хөөсөнцрийг дулаалгын материалд ашигладаг нь галт түймэр гарах, тархах эрсдлийг бий болгодог.
Сүүлд гарсан гал түймрийн талаар олон нийтийн дунд ташаа мэдээлэл тархсан. Залруулбал, Хан-Уул дүүргийн 20 дугаар хороонд гарсан гал түймрийн мэдээллийг 11 цаг 42 минутад өгч галт түймэр унтраах 14 дүгээр анги 11 цаг 47 минутад очсон. Оргил ачааллын үед 3 км замыг таван минутад туулсан.
Унтраах ажиллагааны явцад хайгуул хийхэд барилгын дээвэр дээр таван иргэн байсан. Гал унтраах анги ирэхээс өмнө дөрвөн иргэнийг амжиж буулгасан байсан. Галт түймэр гарсан шалтгаан нөхцөлийг тогтоохоор цагдаагийн байгууллага, шинжээчид ажиллаж байна гэв.
