ОХУ-ын Алс Дорнодын бүс нутаг Камчаткийн хойгт өнгөрсөн долоо хоногийн турш их хэмжээний цас орсны улмаас тус бүс нутгийн төв Петропавловск-Камчатский хот цасанд булагдаад байгаа.
Даваа гарагт орон нутгийн удирдлага шуурхай хуралдаж, хот доторх замуудыг цэвэрлэж, хөдөлгөөнийг сэргээх цаад хугацааг нэгдүгээр сарын 21 байхаар тохиролцжээ.
Өнгөрсөн долоо хоногт ахмад насны хоёр эрэгтэй барилгын дээвэр дээрээс унасан цасанд дарагдаж амиа алдсаны дараа хотын эрх баригчид Пүрэв гарагаас эхлэн онц байдал зарласан юм.
Хотын удирдлага дээвэр дээр хуримтлагдсан цасыг цаг тухайд нь цэвэрлээгүй үл хөдлөх хөрөнгийн менежмэнтийн компаниудыг иргэдийн үхэлд буруутгасан байна.
Цаг уурчид Камчаткийн хойгт нэгдүгээр сарын турш орсон цасны хэмжээг сүүлийн хагас зуун жилийн хугацаанд буюу бүртгэл хөтөлж эхэлсэн цагаас хойш ажиглагдаагүй үзэгдэл гэж дүгнэжээ.
Петропавловск-Камчатский хотод арванхоёрдугаар сард ердийн үеийнхээс гурав дахин их цас орсон бол нэгдүгээр сарын 1-16-ны өдрүүдэд үүнээс 150 хувиар илүү их цас орсон байна.
Хунгарласан цасны зузааны дундаж хэмжээ 170 см, зарим хэсэгт 2.5 метр давжээ.
“Бид ийм зүйлийг хамгийн сүүлд 50 гаруй жилийн өмнө, 1970-аад оны эхээр харж байсан. Орчин үеийн ажиглалтад ийм нөхцөл байдал маш ховор тохиолддог” гэж Камчаткийн ус цаг уурын төвийн дарга Вера Полякова ярьж байна.
Өчигдрийн хуралдааны үеэр хотын дарга Солодов сургуулиудыг аль болох хурдан нээх даалгавар өгчээ. Тэр бас нөхцөл байдал бүрэн сэргэх хүртэл хүнсний бүтээгдэхүүн, түлш шатахууныг түгээх ажлыг хариуцахыг хотын албан тушаалтнуудад даалгасан байна.
Зарим хороололд цасны нуранги үүсэх, барилгын дээврээс мөсөн унжлагууд хүмүүсийн дээрээс унах аюул эрсдэл өндөр байгааг хотын дарга анхааруулжээ.
Эх сурвалж: The Moscow Times
