Нийслэлийн прокурорын газрын хяналтын прокуророос яллагдагч Л.Б-г Эрүүгийн хуулийн тусгай ангийн 17.6 дугаар зүйлийн 1 дэх хэсэгт заасан гэмт хэрэгт холбогдуулан эрүүгийн хэрэг үүсгэн яллагдагчаар татан эрүүгийн хэрэг хянан шийдвэрлэх ажиллагаа явуулсан байна.
Улмаар яллагдагч Л.Б-г “…мөрдөгч, хохирогч, ….хүнийг дарамталсан, эсхүл сүрдүүлсэн, эсхүл нөлөөлсөн” гэх үндэслэл бүхий баримт, мэдээлэл байгаа үндэслэлээр цагдан хорих таслан сэргийлэх арга хэмжээ авах тухай саналыг 2026 оны 03 дугаар сарын 26-ны өдөр Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд ирүүлжээ.
Шүүхээс Л.Б нь мөрдөгч, хохирогч дарамталсан, сүрдүүлсэн, нөлөөлсөн гэх үндэслэл баримтаар тогтоогоогүй байна гэж үзсэн. Улмаар прокуророос ирүүлсэн Л.Б-г яллагдагчаар цагдан хорих таслан сэргийлэх арга хэмжээ авах тухай саналыг хүлээн авахаас татгалзаж шийдвэрлэв.
Эргэн сануулахад, Эрүүгийн цагдаагийн албаны Дэд дарга, цагдаагийн хурандаа Г.Пүрэвдэлгэр “Нэгүүн.мн” сайтын сэтгүүлч Б нь иргэн Ж-ийн талаарх хувийн мэдээллийг өөрийн сайтдаа нийтэлсэн. Мөн хууль ёсны ашиг сонирхолд ноцтой хор хохирол учруулж болохуйц баримт мэдээллийг олон нийтийн сүлжээнд түгээхээр сүрдүүлсэн. Улмаар иргэн Ж 2026 оны гуравдугаар сарын 4-ний өдөр арилжааны банкнаас бэлнээр 30 сая төгрөг авч сэтгүүлч Б-д өгсөн болох нь тогтоогдсон” гэж мэдээлсэн.
Харин “Нэгүүн.мн” сайтын эрхлэгч Л.Баяржаргал “Хүргэлтийн таксигаар над руу 30 сая төгрөг дайгаад явуулсан юм байна. Би тэр мөнгийг нь аваагүй, үүнийг нотлох хэрэгтэй. Ийм юм болоогүй” гэж хариу мэдээлэл хийсэн юм.
Эрүүгийн хуулийн 17.6 дугаар зүйл. Бусдын эд хөрөнгийг авахаар заналхийлэх 1.Бусдыг эд хөрөнгө, эдийн, эдийн бус хөрөнгийн эрхээ шилжүүлэн өгөхийг шаардаж өөрт нь, түүний ойр дотны хүнд хүч хэрэглэсэн, хүч хэрэглэхээр заналхийлсэн, эрх, хууль ёсны ашиг сонирхолд нь ноцтой хор уршиг учруулж болохуйц баримт, мэдээлэл тараахаар сүрдүүлсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.
