Боловсролын яамнаас өнөөдөр /2026.07.27/ 2026-2027 оны хичээлийн жилийн бэлтгэл хангах хүрээнд хэрэгжүүлэх шинэ зохицуулалтуудыг танилцууллаа.
Үүнд хичээлийн жилийн шинэ бүтэц, цэцэрлэг болон нэгдүгээр ангийн элсэлтийн цахим бүртгэл, НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17)-тай холбоотойгоор сургалтын байгууллагуудын үйл ажиллагаанд хийх өөрчлөлт, их, дээд сургуулийн хичээл эхлэх хугацааг багтаажээ.
Боловсролын сайдын 2026 оны долдугаар сарын 8-ны өдрийн А/211 дүгээр тушаалаар хичээлийн жилийн бүтцийг шинэчлэн баталсан байна. Шинэ бүтэц нь дөрвөн улиралтай байхаар боловсруулагдсан бөгөөд өвлийн амралтын хугацааг богиносгож, бага ангийн сурагчдын зуны амралтыг зургаадугаар сарын 1-нээс эхлүүлэх, дунд болон ахлах ангийн сурагчдын зуны амралтыг нэг долоо хоногоор урагшлуулах зэрэг өөрчлөлтийг тусгажээ. Энэхүү бүтцийг боловсруулахдаа багш, эцэг эх, судалгааны байгууллагуудын санал, агаарын бохирдол, томуугийн улирал, хөдөө орон нутгийн мал төллөх үе зэрэг хүчин зүйлсийг харгалзан үзсэн байна.
Мөн 2026-2027 оны хичээлийн жилд улсын хэмжээнд 258,921 хүүхдийг сургуулийн өмнөх боловсролд хамруулах хэрэгцээ үүсэж байгаагаас 126,827 нь нийслэлийн хүүхэд байна. Нийслэлийн хэмжээнд цэцэрлэгт хамрагдах хүүхдийн хүсэлтийг наймдугаар сарын 10-23-ны хооронд E-Mongolia платформоор хүлээн авна. Иймд эцэг эхчүүд өөрийн болон хүүхдийн хаягийн бүртгэлээ баталгаажуулах, өмнө нь хамрагдсан хүүхдийн хувьд “үргэлжлүүлж явах” сонголтоо хийх, шилжилт хөдөлгөөнөө наймдугаар сарын 7-ноос өмнө баталгаажуулах шаардлагатайг анхаарууллаа.
Харин төрийн өмчийн ерөнхий боловсролын сургуулийн нэгдүгээр ангийн элсэлтийн цахим бүртгэл наймдугаар сарын 17-28-ны хооронд улсын хэмжээнд E-Mongolia системээр явагдана. 2020 оны нэгдүгээр сарын 1-нээс арванхоёрдугаар сарын 31-ний хооронд төрсөн зургаан настай хүүхдүүд бүртгэлд хамрагдах юм.
Түүнчлэн НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17)-ыг Улаанбаатар хотод наймдугаар сарын 17-28-нд зохион байгуулахтай холбогдуулан Баянгол, Баянзүрх, Сүхбаатар, Хан-Уул, Чингэлтэй дүүргийн нийт 73 цэцэрлэг, 60 сургуульд тусгай зохицуулалт хийхээр болжээ. Энэ хугацаанд элсэлт, бүртгэл, шилжилт хөдөлгөөнийг цахимаар зохион байгуулж, багш, ажилтнуудыг зайнаас ажиллуулах нөхцөл бүрдүүлэх, шаардлагатай тохиолдолд сургалтыг цахим хэлбэрээр зохион байгуулах юм. Хичээл, сургалтын үйл ажиллагаа есдүгээр сарын 1-нээс хэвийн үргэлжилнэ.
Дээд боловсролын сургалтын байгууллагуудын тухайд хуульд хичээлийн жил эхлэх тодорхой өдөр заадаггүй. Харин тухайн сургууль өөрийн сургалтын хөтөлбөр, элсэлтийг үйл ажиллагаатай уялдуулан тогтоодог. Гэсэн хэдий ч COP-17 арга хэмжээтэй холбоотойгоор Боловсролын яам их, дээд сургуулийн удирдлагуудтай зөвшилцөн 2026 оны наймдугаар сарын 17-ноос элсэлтийн цахим бүртгэлийг эхлүүлэх, наймдугаар сарын 24-нөөс хичээл сонголтыг цахимаар зохион байгуулах, есдүгээр сарын 14-нөөс танхимын хичээлийг эхлүүлэхээр санал нэгдсэн байна. Иймд их, дээд сургууль, коллежийн 2026-2027 оны хичээлийн шинэ жил есдүгээр сарын 15-наас эхлүүлэхээр болжээ.
