Сар бүрийн 3-ны өдрийг цусаа бэлэглэх өдөр болгон тэмдэглэсээр гурав дахь жилтэйгээ золгож байна.
Гуравдугаар сарын цусаа бэлэглэх өдрийг өнөөдөр Цус сэлбэлт судлалын үндэсний төвд тэмдэглэх бөгөөд энэ удаад сагсан бөмбөгийн тамирчид оролцох юм байна.
Энэ удаагийн арга хэмжээг Монголын сагсан бөмбөгийн холбоо нийгмийн хариуцлагынхаа хүрээнд хамтран зохион байгуулж байгаа бөгөөд Худалдаа хөгжлийн банк, Нийгмийн ардчилал-Монголын залуучуудын холбоо ивээн тэтгэгчээр оролцох юм.
МСБХ-ны дээд лигийн тамирчин Т.Санчир нарын шилдэг сагсан бөмбөгчид цусаа бэлэглэхээс гадна уриалга гаргана гэдгийг ЦССҮТ-өөс мэдээллээ.
“Өндөр хөгжилтэй оронд мянган хүнд цус өгөлтийн тоо 30-аас дээш байж цусны хэрэгцээ хангагдана гэж зөвлөдөг. Харин манай улсын хувьд 1000 хүнд 15 байх хэрэгтэй атал улсын дундаж үзүүлэлт өнөөдрийн байдлаар 11 байна. Энэ тоо Улаанбаатар хотод 18, харин орон нутагт 4 байгаа юм. Сүүлийн жилүүдэд байнгын донорын тоо өсөж байгаа хэдий ч энэ нэмэгдүүлэх шаардлагатай” гэдгийг ЦССҮТ-ийн захирал, дэд профессор Н.Эрдэнэбаяр хэлж буй юм.
Тиймээс Азийн хөгжлийн банкны хөнгөлөлттэй зээлээр хэрэгжүүлж буй “Эрүүл мэндийн салбарын хөгжил хөтөлбөр-5” төслийн хүрээнд үндэсний хэмжээнд “Сайн дурын авлагагүй цусны донорын эгнээг өргөжүүлэх хэвлэл мэдээллийн кампанит ажил”-ийг өнгөрсөн сарын 12-ноос эхлүүлсэн.
Кампанит ажлын хүрээнд найман сарын түршид сайн дурын, авлагагүй цусны донорын талаарх мэдлэг олгох, мэдээлэл хүргэх сэтгүүл зүйн бүтээлүүдийг олон нийтийн телевиз, сонин, сайт, нийгмийн сүлжээгээр олон нийтэд хүргэх юм.
