Монгол Ардын Намын дэргэдэх Ахмадын холбооны V чуулган Тусгаар тогтнолын ордноо үргэлжилж байна. Чуулганаар холбооны шинэ удирдлага, бүтэц зохион байгуулалт, дүрмийн өөрчлөлтийн асуудлыг хэлэлцэн шийдвэрлэх юм.
Аймаг, нийслэл, дүүрэг, сум, хорооноос нийт 120 төлөөлөгч энэ удаагийн чуулганд оролцож байна. Үүний 67 хувь нь эрэгтэй, 32 хувь нь эмэгтэй байгаагаас хамгийн ахмад төлөөлөгч нь 82 настай ажээ.
Хуралдааны эхэнд Монгол Ардын Намын Ерөнхий нарийн бичгийн дарга Д.Амарбаясгалан МАН-ын XXVIII Их хурлаас гаргасан бодлого шийдвэр, түүнээс хойш хийж хэрэгжүүлсэн болон цаашид хийх ажлууд, намын бодлого зорилтоо танилцуулж, чуулганд амжилт хүслээ. Түүнчлэн чуулганд МАН-ын дэргэдэх төрийн бус байгууллагуудын удирдлагууд оролцон үг хэлж, амжилт хүссэн юм.
Монгол Ардын Намын дарга, Ерөнхий сайд У.Хүрэлсүх хэлсэн үгэндээ “Ахмадуудын маань үнэт сургааль, ажил амьдралын туршлага залуу хойч үеийнхэнд ус агаар мэт хэрэгтэй байгаа учраас санал зөвлөмжөө харамгүй хэлж байхыг хүсч байна. Манай нам ахмад, дунд, залуу гурван үеийн алтан хэлхээг хадгалдаг улс төрийн хүчин. Монгол Ардын Нам хүчтэй, амжилттай байгаа шалтгаан нь үүнд оршдог гэж боддог. Тиймээс ахмадуудаасаа суралцах ёстой” гэсэн юм.
Монгол Ардын Намын дарга, Ерөнхий сайд У.Хүрэлсүх Ахмадын Холбооны IV чуулганаас сонгогдсон холбооны удирдлагуудад талархал илэрхийлээд шинээр сонгогдох тэргүүнд Ц.Сүхбаатарыг нэр дэвшүүлээ.
Ц.Сүхбаатар нь 1950 онд төрсөн. 1971 онд МУИС-ийг эдийн засагч, статистикч мэргэжлээр төгсчээ. Шинжлэх ухаан доктор, профессор цолтой. 1971-1978 онд Статистикийн төв газар мэргэжилтэн, эрдэм шинжилгээний ажилтан, 1978-1980 онд Хөвсгөл аймгийн Статистикийн товчооны дарга, 1980-1984 онд Статистикийн төв газрын Эдийн засгийн хороонд эрдэм шинжилгээний ажилтан 1990 онд Мал аж ахуйн эрдэм шинжилгээний газарт эрдэмтэн, нарийн бичгийн дарга, 1990-1991 онд Хүнс, хөдөө аж ахуйн яамны дэд сайд, 1991-1998 онд Монголын Хөдөө аж ахуйн биржийн Ерөнхий захирлаар, 1998-2002 онд НҮБ-ийн Хөгжлийн хөтөлбөрийн төслийн зөвлөх, 2002 оноос хойш МАН-д Хяналтын хорооны дарга, Нарийн бичгийн дарга зэрэг албыг хашиж байжээ.
Чуулганы гол мэдээлэл нь тус холбооны тэргүүн С.Төмөр-Очир өнгөрсөн дөрвөн жилд буюу IV чуулганаас хойш хийж, хэрэгжүүлсэн ажлын тайлан байлаа. Энэ хугацаанд тус холбоо тэргүүлэгчдийн хурлаа 16 удаа хуралдуулж, аймаг, нийслэлийн намын хорооны дэргэдэх Ахмадын Холбоодын ажлыг дүгнэн, шилдгүүдээ шалгаруулжээ. Мөн ахмадуудын өмнө тулгамдсан асуудлыг хэлэлцэн холбогдох дээд байгууллагад уламжлах зэрэг ажлуудыг хийж хэрэгжүүлсэн байна.
“Монгол Ардын нам төрийн эрх барих болсноор ахмадуудад чиглэгдсэн олон арга хэмжээ авсныг Ахмадын Холбооны тэргүүн С.Төмөр-Очир хэлсэн үгэндээ онцолсон юм. Тухайлбал, ахмадуудын тэтгэврийн зээлийн хүүг бууруулах, малчдын тэтгэвэрт гарах насыг 50-55 болгож багасгах, хөдөлмөрийн чадвар, ажлын туршлага, оюуны өндөр чадамжтай ахмадуудыг тухайн чиглэлээр нь зөвлөх, туслах үйлчилгээнд ажиллуулах, ахмадууддаа жилд хоёр удаа насны хишиг хүртээх, хямд үнэтэй орон сууцаар хангах, сүүлийн дөрвөн жил нэмээгүй байсан тэтгэврийг бага ч болов нэмсэн зэрэг арга хэмжээг шат дараалалтай авч хэрэгжүүлж байгаад ахмадууд баяртай байгааг илэрхийллээ.
Чуулган 17:00 цаг хүртэл үргэлжилнэ.
