АТГ сар бүрийн 25-нд хэвлэлийн бага хурал хийдэг уламжлалтай. Уг уламжлалынхаа дагуу яг одоо гуравдугаар сард хийсэн ажил болон АТГ-т шалгагдаж буй хэргүүдийн талаар мэдээлэл хийж байна.
АТГ-ын урьдчилан сэргийлэх соён гэгээрүүлэх хэлтсийн дарга, эрхэлсэн комиссар Т.Баярхүү “АТГ-ын ажлын хэсгүүд өнгөрсөн оны 11 дүгээр сард 21 аймаг, 98 суманд ажилласан. Авлигын эсрэг боловсрол олгох, урьдчилан сэргийлэх цуврал сургалтыг зохион байгуулж байна. Он гарснаас хойш 13 яамны ажилтнууд болох 1,150 төрийн албан хаагчийг сургалтад хамрууллаа. Мөн Глоб Интернэшнл ТББ-тай хамтран эрэн сурвалжлах сэтгүүл зүйн сургалтыг зохион байгууллаа. АТГ-т ирүүлсэн өргөдөл гомдлын тоон мэдээллийн хувьд өнгөрсөн 3 дугаар сард нийт 130 өргөдөл, гомдол ирсэн. Үүнээс 86 нь гэмт хэргийн шинжтэй, 36 нь авлига албан тушаал, хөрөнгө орлогын мэдүүлэгтэй холбоотой. Авлига, ашиг сонирхлын зөрчилтэй холбоотой 43 гомдлыг хуулийн хугацаанд шийдвэрлэсэн. Өнгөрсөн сард хийгдсэн төлөвлөгөөт хяналт шалгалтын явцад гурван албан тушаалтны ХАСХОМ зөрчилтэй гарсан. Гурван хүний цалинг бууруулах сахилгын шийтгэл оногдуулсан. 26 холбогдогчтой, 400 тэрбум төгрөгийн хохиролтой хэргүүдийг шүүхэд шилжүүллээ. Мөн УБТЗ ХНН-ийн дарга Д.Жигжиднямааг яллагдагчаар татах саналыг Нийслэлийн Прокурорын газарт хүргүүлээд байна. Түүнчлэн Эрдэнэт үйлдвэр, Жаст компани Стандарт банкнаас зээл авсан асуудал дээр АТГ-т мөрдөн шалгах ажиллагаа явуулж байна.
Тухайн үед холбогдолтой байсан хүмүүсийг нарийвчлан шалгах ажиллагаа явагдаж байгаа. Нэлээн гүнзгий, анхаарал татах асуудлууд бий. С.Баярыг гэрчээр татаж байцаалт авсан. Яллагдагчаар татаагүй.
Ш.Батхүү гэдэг хүнийг нэг бүрчлэн шалгаж байна. Стандарт банкаар ямар хэмжээний зээл авч, тухайн зээл юунд зарцуулагдсан бэ гэдгийг нарийвчлан шалгаж байна. Энэ хэрэгтэй холбоотой Монголын томоохон ААН-үүд хамаарагддаг. Ш.Батхүүтэй холбоотой өмч хөрөнгийг шалгаж, бие биедээ бэлэглэсэн, илт бага үнээр худалдан авсан гэх мэт сэжиг бүхий зүйлсийг нь шалгаж байна. ҮХЦ-ийн гишүүн Д.Сугарыг гэрчээр дуудаж байцаалт авсан. Гарын үсгийг нь хуурамчаар зурсан байх магадлалтай гэсэн шинжээчийн дүгнэлт гарсан. Тэр хүнийг дахиж дуудна. Жаст компанийн Ш.Батхүүтэй холбоотой асуудал дээр Алтжин группийн захирал Алтангаас тайлбар, байцаалт, мэдүүлэг авсан. Одоо ч авна. Мөн Элчин сайд М.Энхсайханаас АТГ байцаалт авч байгаа” гэв.
