Манай улс хуурай, ширүүн уур амьсгалтай бөгөөд жил бүр дулааны улирал эхлэхтэй зэрэгцэн ой хээрийн түймэр маш олон тоогоор бүртгэгдэж, их хэмжээний хохирол амсдаг. Энэ нь ихэвчлэн хүний буруутай үйлдлээс үүдэлтэй байдаг тул холбогдох байгууллагаас ард иргэдэд байнга сэрэмжлүүлэг мэдээг хүргэдэг ч төдийлөн үр дүнд хүрэхгүй байна. Тухайлбал өнгөрсөн амралтын өдөр орон нутагт хэд хэдэн хээрийн түймэр гарлаа.
Сэлэнгэ аймгийн Хушаат сумын Мөнхтолгой багийн “Хашаат” гэдэг газар /сумын төвөөс баруун хойд зүгт 50 км-т/ хээрийн түймэр гарсан байна. Энэ талаар энэ сарын 25-ны өдрийн 17:45 цагт мэдэгдэж, тус аймгийн Онцгой байдлын газрын 12 алба хаагч, 1 автомашинтай, орон нутгийн 10 иргэн, 2 автомашинтай унтраахаар ажиллаж байна.
Ховд аймгийн Чандмань сумын Сүлжээ багийн “Хар-Ус” нуурын хөвөөнд /сумын төвөөс зүүн зүгт 70 км-т/ зэгс шатаж байна гэсэн дуудлагыг мөн энэ сарын 25-ны өдрийн 22:55 цагт хүлээн авчээ. Ингээд тус аймгийн Онцгой байдлын газрын 27 алба хаагч, 2 автомашинтай, орон нутгийн 8 иргэн, 1 автомашинтай унтраахаар ажиллаж, өнөөдрийн 06:24 цагт цурманд оруулжээ.
Дорнод аймгийн Матад сумын Буян-Өндөр багийн “Төгөл гурван дэрс” гэдэг газар /сумын төвөөс зүүн хойд зүгт 100 км-т/ хээрийн түймэр гарсан байна. Энэ сарын 26-ны өдрийн 03:30 цагт ирсэн энэ дуудлагын дагуу тус аймгийн Онцгой байдлын газрын 12 алба хаагч, 1 автомашинтай 04:50 цагт түймрийн голомт руу явсан байна.
Иймд нийт ард иргэд Та бүхэн хуурайшилт ихтэй байгааг онцгойлон анхаарч орон нутагт зорчихдоо ил задгай гал хаяхгүй байх, хог хаягдлаа орхихгүй байж, түймрийн аюулаас урьдчилан сэргийлэхийг дахин сануулж байна.
