АТГ-аас сар бүрийн 25-нд сэтгүүлчдэд хийсэн ажлаа тайлагнаж, мэдээлэл хийдэг уламжлалтай. Энэ сарынхаа хурлыг өнөөдөр хийлээ. Хуралд АТГ-ын мөрдөн шалгах хэлтсийн дарга Э.Идэрцог, Хяналт шалгалт дүн шинжилгээний газрын дарга Х.Хашбаатар, Урьдчилан сэргийлэх, соён гэгээрүүлэх хэлтсийн дарга Т.Баярхүү нар оролцож мэдээлэл өглөө. Тэд АТГ-ын өнгөрсөн гуравдугаар сард хийгдсэн ажлуудын тайлангаа тавилаа.
Мэдээллийн дараа АТГ-ын мөрдөн шалгах хэлтсийн дарга Э.Идэрцог сэтгүүлчдийн сонирхсон асуултад хариулсан юм.
-Эрдэнэтийн 51 хувийн асуудалтай холбоотойгоор Үндсэн хуулийн цэцийн гишүүн Д.Сугар гэдэг хүнийг хэрэгт татсан уу, үгүй юу гэдэг асуудал олон нийтийн анхаарлын төвд байна. Энэ хүнийг хэрэгт татах үндэслэл бий юу?
-Төрийн өмчийн хорооны даргаар тухайн үед ажиллаж байсан, одоо Үндсэн хуулийн цэцийн гишүүнээр ажиллаж байгаа Д.Сугар гэдэг хүнээс гэрчээр байцаалт авсан. Шинжээчийн дүгнэлтээр гарын үсгийг нь хуурамчаар зурсан байх магадлалтай байна гэсэн шинжээчийн дүгнэлт гарсан байдаг. Шалгалтын явцад нэмж тодруулах зүйлс гарвал нэр дурдагдаж байгаа албан тушаалтнуудыг дахин дуудаж тайлбар, байцаалт авна.
-“Жаст” компанийн Ш.Батхүүд холбогдох хэргийн шалгалтын ажиллагаа юу болж байна?
-“Жаст” гэдэг компани, Ш.Батхүү гэдэг хүн хэзээнээс ямар бизнес хийж эхэлсэн, хэдэн төрлийн үйл ажиллагаа явуулж, хэдэн компани, аж ахуй нэгж үүсгэн байгуулсан бэ, Стандарт банкнаас ямар хэмжээний зээл, ямар дансаар, ямар зориулалтаар Монгол Улсад орж ирсэн бэ гэдгийг нэг бүрчлэн шалгаж байна. Шалгах ажиллагаанд эдийн засгийн тусгай мэдлэг бүхий эдийн засагч, аудитын хүмүүс оролцож байна. Ш.Батхүүтэй холбоотой, хамаарал бүхий этгээдүүдийн аж ахуй нэгжийн өмч хөрөнгө, нуугдмал хөрөнгийг битүүмжлэх гэх мэт өмч хөрөнгө захиран зарцуулсан асуудал тус бүрийг шалгаж байна.
-Эрдэнэт үйлдвэрийг барьцаанд тавьсан асуудалд С.Баярыг яллагдагчаар татсан юм уу. Хэрэг бүртгэлийн хэрэг үүсгэсэн гэдэг нь яг юу гэсэн үг юм бэ?
-Жаст компани олон улсын стандарт банкнаас зээл авсан асуудалд Эрдэнэт үйлдвэр баталгаа гаргасан гэх хэрэгт 2013 оноос хойш эрүүгийн хэрэг үүсгэн шалгаж байна. Анх гэрээ байгуулах үед тухайн үед Монгол Улсын Ерөнхий сайд нь хэн байсан, төрийн өмчийн хорооны дарга хэн байсан, Монгол Оросын советын хэсгийн дарга нар нь хэн байсан, Эрдэнэт үйлдвэрийн шийдвэр гаргах түвшний албан тушаалтнууд хэн байсан гэх мэт бүгдийг нарийвчлан шалгах ажиллагаа явагдаж байгаа. Нэлээд гүнзгий, анхаарал татахуйц асуудлууд байгаа. Монгол Улсын Ерөнхий сайд асан С.Баярыг энэ хэрэгт гэрчээр байцаалт авсан. Яллагдагчаар татаж шалгаагүй.
-М.Энхсайханыг ямар үндэслэлээр дуудсан бэ. Ирж мэдүүлгээ өгсөн үү?
-Монгол Улсын Шадар сайдаар ажиллаж байсан М.Энхсайхан Тавантолгойн орд газрыг ашиглахтай холбоотой асуудалд засгийн газрын ажлын хэсгийн ахлагчаар ажиллаж байх хугацаандаа гэрээний төслийг боловсруулсан. Энэ асуудалд нь албан тушаалаа урвуулсан, хэтрүүлсэн асуудал байна уу гэх асуудлаар Нийслэлийн прокурорын газраас эрүүгийн хэрэг үүсгэн шалгаж байсан. Тиймээс Нийслэлийн прокурорын газрын дуудах хуудсын дагуу дуудуулсан. М.Энхсайхан өнөөдөр ирчихсэн, яг одоо гэрчийн байцаалт, мэдүүлэг өгч байна.
-Ш.Батхүүтэй холбоотойгоор Г.Алтанг байцаасан гэж үнэн үү?
-Жастын Ш.Батхүүтэй холбоотой асуудалд Алтжин компанийн захирал Г.Алтан, тэдгээрийн хооронд мөнгө төгрөг шилжсэн, тодорхой ашигт малтмалын лиценз худалдаж авч, хоорондоо шилжүүлсэн гэх мэт харилцаа үүссэн байдаг. Энэ асуудлаар Г.Алтанаас өмнө нь тайлбар, мэдүүлэг авсан байдаг. Одоо бас дуудаж байцаалт авна. Г.Алтаны хүүхэд Э.Сүрэн гэж хүн төрийн банкнаас мөнгө төгрөг нэхэмжилсэн асуудлаар иргэний журмаар шүүхийн шийдвэр гарсан байдаг. Энэ шүүхийн шийдвэр хууль зүйн үндэслэлтэй гарсан уу үгүй юу гэдэг асуудалд эрх бүхий байгууллагууд шалгах ёстой. Бид тэр өр зээл нь үнэхээр бодитой байсан уу гэдгийг анхаарч шалгаж байгаа. Шаардлагатай, үндэслэл бүхий асуудал тогтоогдвол үргэлжлүүлэн шалгана.
-Сангийн сайд асан С.Баярцогттой холбоотой хэргийн шалгалт ямар байдлаар үргэлжилж байна вэ?
-Оюутолгойн гэрээтэй холбоотой асуудалд Нийслэлийн прокурорын газраас эрүүгийн хэрэг үүсгэн шалгаж байна. Энэ асуудалд Сангийн сайд асан С.Баярцогтыг дуудаж тайлбар, мэдүүлэг авсан. Мөн олон алба хаагчидтай холбоотой анхаарал татахаар асуудлууд байгаа. Нухацтай шалгана.
-Сангийн сайд Ч.Хүрэлбаатараас мэдүүлэг байцаалт авсан асуудал байгаа юу?
-Увс аймгийн нутагт байрлах Хотогор шанагын уурхай, уурхайн хувьцаа эзэмшигчдийн хоорондоо хувьцаагаа худалдсан гэдэг асуудлаар хэрэг бүртгэлтийн хэрэг нээж шалгаж байгаа. Энэ асуудлаар Сангийн сайд Ч.Хүрэлбаатараас мэдүүлэг авсан.
-УИХ-ын гишүүн Д.Гантулгад холбогдох хэрэг юу болж байна?
-УИХ-ын гишүүн Д.Гантулгын хэрэг дээр ажилласан шинжээчийн дүгнэлт гарсан. Д.Гантулгыг дуудаж байцаалт авсан. Нийслэлийн прокурорын газраас эрүүгийн хэрэг үүсгэх болсон гэсэн тогтоол гарсан. Прокурорын тогтоолыг Д.Гантулгад танилцуулах гэж 18 удаа хандсан ч ирэхгүй байна, хуралтай, гадаадад явж байна, хөдөө явж байна гэх шалтгаанаар удаа дараа дуудуулсан ч ирээгүй. Нийслэлийн прокурорын газрын тогтоол танилцуулахад үл хүндэтгэж ирээгүй учраас хоёрдугаар сарын 22-нд баривчлах санал хүргүүлсэн ч үндэслэлгүй байна гэж үзээд буцаасан.
