Урин дулаан болж, цас мөс хайлсны улмаас шар усны үер бууж байна. Тухайлбал, Сэлэнгэ аймгийн Дулаанхааны дөрвөн замаас Ерөө-Хүдэр сумын чиглэлийн автозамын 32 км /Ерөө сум/, 64 км-т /Хандгайтын үтрэмийн орчимд 110 метрийн урттай/ их хэмжээний эвдрэл үүссэн байдалтай байгаа талаар Замын цагдаагийн газраас мэдээллээ.
Иймд хөдөлгөөнд оролцогч жолооч нарт үзэгдэх орчин хязгаарлагдмал замын тойруу, харанхуй үед явахдаа хурдаа тохируулан, болзошгүй аюул, ослоос сэргийлж сонор сэрэмжтэй явахыг анхааруулж байна. Тус аймгийн Замын цагдаагийн тасгийн алба хаагчид болон Улаанбаатар зам засвар арчлалт ТӨҮГ хамтран зам засварлах, тэмдэг, хайс хашлага байрлуулах ажил зохион байгуулж, арга хэмжээ авч ажиллаж буй аж.
Дулаанханы дөрвөн замын уулзвар-Ерөө-Хүдэр хүртэлх хатуу хучилттай автозамыг өнгөрсөн оны зургадугаар сард ашиглалтад оруулж байжээ. Ашиглалтад ороод нэг жил ч болоогүй энэхүү зам шар усны үерийн улмаас ийн эвдрэл үүсчээ.
