Улс орон даяар өнөөдөр гамшгаас хамгаалах сургалт зохион байгууллаа. Нийслэлийн хэмжээнд 110 цэгийг төлөвлөж, гамшгийн аюулын зарлан мэдээллийн дуут дохиогоор иргэд, олон нийтийг түр цугларах цэгүүдэд шилжин байршуулж дадлага сургуулилт хийсэн. Иргэдийн хувьд эдгээр байгуулсан цэг дээр очиж, гамшгаас хамгаалах сургалтад оролцож, гарч болох аюул эрсдэлээс өөрсдийгөө хэрхэн хамгаалж, урьдчилан сэргийлэх талаар мэдлэг мэдээллийг олж авах зорилготой. Харин зарим цэг дээр цөөхөн тооны иргэд иржээ. Тухайлбал, Сүхбаатар дүүргийн 10 дугаар хорооны иргэд Гуравдугаар сургуулийн талбай дээр цуглах ёстой. Гэвч Үндэсний биеийн тамирын их сургуулийн оюутан, багш нар болон хорооны хэдэн ажилчдаас өөр хүмүүс харагдсангүй. Энэ байдлаас ажиглаад харахад сургуулилтад оролцож байгаа хүмүүс хариуцлагатай, өөрийнхөө аюулгүй байдалд анхаарал тавьж, зохион байгуулалттай ажилд ач холбогдол өгч өөрөөр ханддаг хүмүүс цөөн байв. Зарим нэг “ингэж байгаад дуусна даа” гэж хандах хүмүүс ч байлаа. Мөн гамшгийн сургалтыг зохион байгуулж байгаа онцгой байдлын газраас иргэдэд зөвлөгөө, мэдээлэл өгөхгүйгээр, зөвхөн байгууллагын бүртгэлийг л хийж байв. Уг нь онцгой байдлын алба хаагчид гамшиг ослын үед иргэд өөрсдийнхөө эрүүл мэндийг хэрхэн хамгаалах, зохион байгуулалттай арга хэмжээнд хэрхэн оролцох талаар мэдээлэл зөвлөгөө өгөх ёстой. Гэтэл тийм зүйл байсангүй.
Энэ талаар Сүхбаатар дүүргийн 10 дугаар хорооны иргэн Н.Буян” Гамшгаас хамгаалах сургалтыг их сүртэй зүйл болох байх гээд толгой дээрээ тавих юмтай гарч ирлээ. Гэтэл нэг их сүртэй юм болохгүй байна. Гадуур явж байгаа хүмүүс ч гэсэн нэг их ач холбогдол өгөхгүй байна. Дуут дохио нь их сүртэй дуугарч байна” гэлээ. Зарим иргэдийн хувьд ажилтай явж байгаа болохоор ач холбогдол өгөхгүй байгаа гэдгээ хэлж байв.
Энэ үйл ажиллагаанд хамгийн идэвхтэй оролцож байгаа хүмүүс бол цэцэрлэгийн багачууд байлаа.
Зарлан мэдээллийн дохиогоор ажиллуулах сургалтыг долоо дахь жилдээ хийлээ. Анх хамрагдаж байсан хүний тоог өнгөрсөн жилүүдтэй харьцуулахад маш их нэмэгдсэн гэдэг. Өнгөрсөн жил Улаанбаатар хотын хэмжээнд 5-6 мянган хүн хамрагдсан гэдгийг албаны хүмүүс хэлж байсан. Монгол Улсын хэмжээнд нийт 395 зарлан мэдээллийн сирени дохио байдгаас Улаанбаатар хотод 60 дуут дохиоллын цамхаг байна. Үүнээс 18 нь электрон юм байна.
