“Эрүүгийн хэрэг дэх эрх зүйн харилцан туслалцаа-хамтын ажиллагаа” сэдэвт хэлэлцүүлгийг Авлигатай Тэмцэх Газраас санаачлан өнөөдөр зохион байгууллаа.Хэлэлцүүлэгт Улсын Дээд Шүүх, Улсын Ерөнхий Прокурорын Газар, Хууль Зүй Дотоод Хэргийн Яам, Тагнуулын Ерөнхий Газрын төлөөллүүд оролцож илтгэл хэлэлцүүллээ.
Хууль Зүй Дотоод Хэргийн дэд сайд Б.Энхбаяр “Эрүүгийн эрх зүйн харилцан туслалцааны гэрээ гэдэг их чухал ойлголт. Гэмт хэргүүд даяарчлагдаж байна. Өөрөөр хэлбэл гэмт хэрэг ганцхан тухайн улсын дотор үйлдэгддэг гэхээсээ илүү мөнгө угаах, авлига албан тушаал, хүн худалдаалах гэмт хэргүүд илүү зохион байгуулалттай бөгөөд хил дамнасан шинжтэй болж байна.
Энэ утгаараа эдгээр төрлийн гэмт хэргийг илрүүлэх нотлох ажиллагаа ганц улсын хуулийн байгууллагын хүчин чармайлтаар шийдэгдэхгүй. Үүн дээр бусад улс орны ижил төрлийн байгууллагуудтай нягт хамтран ажиллаж байж тухайн буруутай этгээдүүдийг шүүхийн өмнө нотлож, хариуцлага хүлээлгэх боломжтой” гэв.
Хуулийн байгууллага хуулийн дагуу ажлаа явуулж байгаа
Энэ хэлэлцүүлгийн үеэр АТГ-ын дарга Х.Энхжаргалаас цаг үеийн асуудлаар зарим зүйлийг тодрууллаа.
-Оффшор бүсэд данс эзэмшдэг бол энэ талаараа мэдүүлэх сүүлийн хугацаа дөрөвдүгээр сарын 06-нд дууссан. Энэ талаар мэдээлэл өгөхгүй юу ?
-Оффшор бүсэд байгаа хөрөнгийн талаар дөрвөн хүн манайд мэдүүлгээ өгсөн. Илүү дэлгэрэнгүй мэдээлэл удахгүй тавигдана.
-Оффшор бүсээс хөрөнгөө оруулж ирээгүй хүмүүст ямар арга хэмжээ авах вэ?
-Офшор бүсээс хөрөнгөө оруулж ирээгүй хүмүүсийг хуульд юу гэж заасан байна тэрүүгээр нь шийтгэнэ. Бид бололцоот бүх шалгалтуудыг хуулийн дагуу явуулж байгаа.
-Ерөнхийлөгч таныг ажлаа хийхгүй байна гэж шүүмжлээд байгаа. Энэ асуудалд та ямар тайлбар өгөх вэ?
-За яах вэ. Хуулийн байгууллага хуулийн дагуу ажлаа явуулж байгаа. Хуулийн байгууллагад хөндлөнгөөс нөлөөлж болохгүй. Хуулийн хүрээндээ л ажиллаж байна. Хэн юу гэж дүгнэх нь тэр хүмүүсийн асуудал.
