УИХ-ын гишүүн Д.Мурат Баян-Өлгий аймгийн иргэн Б.Бахытгүлд бэлгийн дарамт учруулсан тухай мэдээлэл гараад байгаа билээ. Энэ явдлын дараа Д.Мурат гишүүн Б.Бахытгүлд “гар хүрч”, хөнгөн зэргийн гэмтэл учруулсан тул Эрүүлгийн хуулийн 11.6 дугаар зүйл ангийг үндэслэн түүнийг шалгаж байгаа аж.
Харин энэ асуудлын талаар хохирогч Б.Бахытгүлийн өмгөөлөгч Г.Батбаяраас тодруулхад: Д.Муратын янз бүрийн зураг олон нийтэд цацагдсан. Ер нь бол 2018 оны нэгдүгээр сараас уг хэргийг шалгаж эхэлсэн. Энэ явдал юунаас улбаатай вэ гэхээр миний үйлчлүүлэгч Б.Бахытгүлийг 2017 оны намар Д.Мурат зодсон байдаг. Б.Бахытгүлд хөнгөн зэргийн гэмтэл учруулсан гэх шүүх эмнэлгийн дүгнэлт ч бий. Ингээд энэ асуудлаар өргөдөл гаргасан. Энэ хэргийг нийслэлийн прокуророос бусдын биед хөнгөн зэргийн гэмтэл учруулсан гэдэг үндэслэлээр шалгаж байгаа. Он гараад, нэгдүгээр сараас Д.Муратыг яллагдагчаар татсан. Миний үйлчлүүлэгийн зүгээс ямар нэг бэлгийн харилцаа байгаагүй гэдэг байр сууриа илэрхийлж байгаа. Би үүнд нь итгэж байгаа. Харин Д.Мурат бэлгийн харилцаанд орохыг санал болгосон үйлдэл гаргаж байсан байна. Гэвч Эрүүгийн шинэ хуулиас “бэлгийн дарамт үзүүлэх” гэдэг зүйл заалт хасагдсан учраас шалгах үндэслэлгүй болж байгаа юм.
Ер нь Д.Мурат бол гэр бүлийн хувьд тогтворгүй хүн юм байна, Хятад улсын иргэнтэй гэр бүл болсон байж болзошгүй, хоёр эхнэртэй байх магадлалтай, диплом нь хуурамч байж магадгүй гэх мэт үндэслэлээр бид хардаж байгаа. -Д.Муратын эхнэр нь Хятад улсын иргэншилтэй байснаа Казакстаны иргэн болчихсон одоо Алмата хотод амьдарч байгаа. Гэтэл одоо Монгол Улсын иргэнтэй гэр бүл байна. Хоёр гэрлэлттэй байх магадлалтай гэдэг хардлага бидэнд бий. Энэ асуудлыг шалгуулах эсэх нь манай үйлчлүүлэгчийн хүсэл зоригийн асуудал. Хэрэв Д.Мурат гишүүн Хятад улсын иргэнтэй гэрлэсэн бол Хятадын хүргэнд тооцогдоно. Үүнээс гадна тэр хүн Баян-Өлгий аймагт “Шанагатын уурхай”-н лиценз эзэмшиж байна. Энэ ордын тусгай зөвшөөрөл хуулийн дагуу авагдсан эсэх олон асуудал бий. Хэрэв Д.Мурат гэм буруугаа хүлээхгүй бол дээрх бүгдийг шалгуулахыг үгүйсгэхгүй. Одоо энэ хэрэг шүүхэд шилжих шатандаа байна. Энэ нь хөнгөн зэргийн гэмт хэрэг учраас хурдан шалгахыг шаарддаг. Эсрэг талын зүгээс хуулийн байгууллагын шалгалтыг аль болох удаашруулах хүсэл зорилго бий. Төрийн өндөр албан тушаалтан байгаа учраас янз бүрийн ашиг сонирхолтой зүйл илэрч болзошгүй гэж харж байгаа гэв.
