Умард Солонгосын талд хулгайлагдаж, хүчээр кинонд тоглосон Өмнөд Солонгосын жүжигчин эмэгтэй 91 насандаа таалал төгслөө. Өмнөдийн алдартай жүжигчдийн нэг Чой Юн Хи нь 1970-аад онд удирдагч Ким Жон Илийн үед хулгайлагдсан аж. Түүний хуучин нөхөр, нэрт кино найруулагч мөн хэдэн сарын дараа хулгайлагдсан ч тэд хамтдаа зугтаж байжээ. Пхеньяны зүгээс тэднийг хулгайлсан гэх мэдэгдлээс татгалзаж, жүжигчин бүсгүйн гэр бүл хоргодох газар хайж ирсэн хэмээн мэдүүлсээр иржээ.
Хатагтай Чой нь өнгөрөгч Даваа гаригт Өмнөд Солонгосын эмнэлэгт таалал төгссөн байна. Түүний том хүү, найруулагч Шин Жеон Гюнь хэвлэлийнхэнд мэдэгдсэнээр жүжигчиний бөөрний өвчин нь хүндэрсний улмаас эмнэлэгт хүргэгдсэн аж.
Чой Юн Хи нь нь 1926 онд Өмнөд Солонгосын Гёонгги мужид мэндэлж, 1947 оноос кино урлагт хөл тавьжээ. Тэрээр нөхөр Шин Санг-окын хамт тус улсын кино урлагийн хамгийн алдартай гэр бүл байсан юм. Гэвч 1970-аад онд гэр бүл салж, хатагтай Чойгийн хувьд уналтанд орсон байна.
Тэр үед хатагтай Чой нэр хүндээ дахин сэргээхээр кино компанитай хамтран ажиллахаар Хонг Конгийн нэгэн бизнесмэнтэй уулзжээ. Түүнийг Хонг Конг руу явахыг ятгаж, аваачсан аж. Найман хоногийн дараа хатагтай Чойг Пхеньянд аваачиж, тансаг орон сууцанд хатуу харуул хамгаалалттайгаар байлгах болсон гэнэ.
Чой хатагтайн хуучин нөхөр ноён Шин эхнэрээ хайж Хонг Конгт очсон ч мөн л умардынханд хулгайлагджээ. Тэр үед Умард Солонгосын удирдагч Ким гайхамшигтай кино бүтээлгэж, Холливудын кино үзэгчдийн анхаарлыг татахыг хүсч буйгаа хэлж, олон улсын кино тайзнаа өрсөлдөхөд нь туслахыг хүссэн гэнэ.
Ингээд найман жилийн хугацаанд ноён Кимийн итгэлийг хүлээж, кино бүтээл туурвихын тулд Вена руу явах зөвшөөрөл авч, тэнд байхдаа АНУ-ын ЭСЯ-наас улс төрийн орогнол хүссэн аж. Гэвч эх нутагтаа эргэн ирснээс хойш хэдхэн жилийн дараа найруулагч Шин нас барсан байна.
Тэдний энэ түүх дэлхий дахины анхаарлыг татаж, 2016 онд бодит явдлаас нь сэдэвлэсэн “The Lovers and the Despot” нэртэй кино бүтээлийг дэлгэцнээ гаргажээ.
Б.Болормаа
