Хөвсгөл аймгийн Алаг-Эрдэнэ сумын Хатгал тосгоны “Хүслийн хад” гэдэг газар Ханх сумаас Мөрөн сумын чиглэлд Хөвсгөл нуурын мөсөн дээгүүр автомашинтай явсан 6 хүн осолджээ. Энэ талаарх мэдээлэл тус аймгийн Онцгой байдлын газарт өчигдөр 17:50 цагт ирсэн байна. Дуудлага хүлээн авсан даруйдаа хурандаа Ё.Пүрэвсүрэнгээр ахлуулсан онцгойгийн алба хаагчид, тус аймаг дахь Цагдаагийн газрын алба хаагчид, нутгийн захиргааны байгууллагын ажилтнууд очиж газар дээр нь ажиллаж байгаа юм байна.
Мөн өчигдөр 21:29 цагт АТА-ын эрэн хайх салбарын бүлгийн дарга ахмад Б.Энхболдоор ахлуулсан алба хаагчид Хөвсгөл аймгийн чиглэлд гарсан аж. Харин өнөөдөр өглөө 07:00 цагт Орхон аймгийн Онцгой байдлын газрын дарга, хурандаа Г.Ганбаатараар ахлуулсан алба хаагчид, Булган аймгийн Онцгой байдлын газрын алба хаагчид ослын газарт очиж ажиллаж байна.
Осолдсон автомашинд Ханх сумын харьяат иргэн Г /30 настай, эрэгтэй/, Ханх сумын харьяат О /15 настай, эрэгтэй/, Мөрөн сумын харьяат иргэн Б /58 настай, эрэгтэй/, Мөрөн сумын харьяат иргэн М /51 настай, эрэгтэй/, Мөрөн сумын харьяат иргэн Б /29 настай, эрэгтэй/, Г /6 настай, эрэгтэй/ нар явсан гэнэ. Урьдчилсан мэдээгээр иргэн Г /30 настай, эрэгтэй/, О /15 настай, эрэгтэй/ нарыг эсэн мэнд аварчээ.
Хүслийн хад нь аймгийн төвөөс 140 км, Хатгал тосгоноос зүүн хойд зүгт 40 км-т оршдог юм.
