“Хохирогчдын эрх ашгийг хамгаалах шударга төв” ТББ болон долоон сарын 1-ний өдрийн хохирогчид, тэдний ар гэрийнхэн С.Баярт давхар хэрэг үүсгэх талаар өнөөдөр “Үндэсний мэдээллийн төв”-д мэдээлэл хийлээ.
“Хохирогчдын эрх ашгийг хамгаалах шударга төв” ТББ-ын тэргүүн Х.Оюунцэцэг “С.Баярыг Ерөнхий сайд байх үед буюу 2008 оны долдугаар сарын 1-нд УИХ-ын сонгуулийн дүнтэй холбогдуулан томоохон үймээн дэгдсэн. Энэ өдөр Монгол Улс түүхэндээ анх удаа онц байдал тогтоож, үймээний улмаас таван хүний амь нас эрсэдсэн. Энэ хэргийг зохион байгуулалттай гэж ярьдаг, тэр нь ч үнэн. Тухайн өдөр онц байдал тогтоохыг Ерөнхий сайд С.Баяр тулган шаардаж, онц байдлын бүсээс гадна явсан хүмүүсийг цагдаа, цэргийн хүчээр хоморголон баривчилж, энгийн ард иргэд рүүгээ галт зэвсгээр буудсан. Тухайн үед бүх телевизүүдийг хааж нийгмийг айн цочирдуулж иргэний хөдөлгөөний лидерүүдийг баривчлан 800 гаруй залуучуудыг хоморголон баривчилж албаар байраа шатаагаад хохирсон дүр үзүүлж нийгмийн цочирдлыг далимдуулан МАХН буюу одоогийн МАН засгийн эрхийг авсан. Одоо мөрдөн шалгагдаж байгаа С.Баяр эрүүл мэндийн шалтгааны улмаас ялаас мултрах гэсэн оролдлогуудыг хийж байна. Шалгаж байгаа нөхцөл байдал дээр нь Эрүүгийн хэрэг үүсгэн өнөөдөр таван хүний амь нас, эрүүл мэнд болон амь насаараа хохирсон иргэдийн хохирлыг барагдуулах ёстой” гэв.
Харин энэхүү хуралд оролцсон 2008 оны долдугаар сарын 1-нд хөл рүүгээ буудуулж гэмтсэн хохирогч Ж.Батзаяа “Миний баруун хөлний дунд чөмөг гэмтсэн. Тухайн үед би 16 настай байсан. Түүнээс хойш өнгөрсөн 10 жилийн хугацаанд хоёр жил эмнэлгийн орон дээр, дөрвөн жил суга таягтай, гурван жил хөдөлмөрийн чадваргүй амьдарч байна. Өнөөдөр би 70 хувийн хөдөлмөрийн чадвар алдсан. Өвөл болохоор шарх сэдэрч идээ бээр гоождог.
Тэр үед намайг хэн буудсан юм бэ. Цагдаа буудсан. Тухайн үед би цагдаа ахаа авраач гэхэд цагдаа нар дээрээс ирээд дэвсч байсан. Одоо би тэр буудсан цагдааг хэрвээ намайг харж байгаа бол “насаар минь тамлахын оронд тэр үед гүйцээгээд буудчихгүй яав даа” гэж хэлмээр байна. Эмч нар дахиад хөлөө эмчлүүлэх, хагалгаанд орох боломжгүй гэсэн. Тайруулахаас өөр аргагүй болсон. 70 сая төгрөгөөр хагалгаанд орсны эцэст хөлөө тайруулхаар болчихлоо” гэлээ.
Долдугаар сарын 1-ний өдрийн хохирогчид Ерөнхийлөгч, АТГ, прокурорын байгууллагад шаардлага хүргүүлхээ мэдэгдлээ.
