Саунд байнга суух нь зүрхний шигдээс өвчин тусах эрсдэлийг бууруулдаг гэнэ. Энэ талаар Дорнод Финландын их сургуулийн хэвлэлийн алба 15 жилийн турш үргэлжилсэн судалгааны дүнд үндэслэн мэдээлжээ. Судалгаанд Финландын Куопио хотын оршин суугчид болох 53-74 насны эрэгтэй, эмэгтэй 1628 хүн хамрагдсан бөгөөд тэднийг саунд хэр тогтмол суудагаар нь гурван бүлэгт хуваажээ.
Ингээд 15 орчим жилийн хугацаанд ажиглалт хийхэд, долоо хоногт 4-7 удаа саунд суудаг хүмүүсийн хувьд зүрхний шигдээсээр өвдөх магадлал нь долоо хоногт ганцхан удаа саунд ордог хүмүүстэй харьцуулахад 61 хувиар бага байсан нь тогтоогдсон байна. Харин долоо хоногт 2-3 удаа саунд ордог хүмүүсийн хувьд дээрх магадлал 14 хувиар бага байжээ. Түүнээс гадна, саунд суух нь эрэгтэй, эмэгтэй хүмүүсийн аль алинд нь эергээр нөлөөлдөг нь ажиглагджээ. Үүний шалтгаан нь, саунд сууснаар цусны даралт буурч, дархлааны тогтолцоо идэвхжин, зүрхний үйл ажиллагаа сайжирдагтай холбоотой байж магадгүй гэж эрдэмтэд үзэж байна. Саунд суух нь цусны даралтыг бууруулж, судасны уян хатан чанарыг сайжруулдаг гэдгийг эрдэмтэд өмнө нь тогтоосон билээ. Саунд тогтмол ордог хүмүүсийн хувьд уушигны янз бүрийн өвчнөөр өвчлөх эрсдэл бага байдаг аж. Түүнчлэн байнга саунд орох нь ой ухаан муудах өвчнөөс сэргийлдэг байж магадгүй гэнэ.
