Сүхбаатар дүүргийн 16 дугаар хороо Дамбадаржаагийн нутаг дэвсгэрт “Улаанбаатар хотын ой” буюу Монгол-Солонгосын найрамдлын цэцэрлэгт хүрээлэнгийн шав тавих ёслолын ажиллагаа боллоо. БНСУ-н Ойн ерөнхий газрын буцалтгүй тусламжаар энэхүү ажлыг хэрэгжүүлж байгаа юм байна.
“Улаанбаатар хотын ой”-г нийт 3 тэрбум вонын төсвөөр 40 га талбайд бүтээн байгуулалтын ажил хийх ба 2021 оны тавдугаар сар хүртэл хэрэгжих аж. Цэцэрлэгт хүрээлэнд танин мэдэхүйн цэцэрлэг, унадаг дугуйн зам, хүүхдийн тоглоомын талбай, спортын талбай зэргийг байгуулж, 100 гаруй нэр төрлийн мод, ургамлыг тарих юм байна.
Монгол Улс, БНСУ-ын Засгийн газар хамтран 2007 оноос цөлжилтөөс сэргийлэх, шар шороон шуургыг багасгах зорилгоор “Монгол-Солонгосын ногоон хэрэм” төслийг хэрэгжүүлж, төслийн эхний үе шат 2016 онд дууссан. Төсөл хэрэгжсэн хугацаанд БНСУ-ын Засгийн газраас 12 сая орчим ам.долларын хөрөнгө оруулалт, санхүүжүүлэлт хийж, Төв аймгийн Лүн суманд 20 га, Өмнөговь аймгийн Даланзадгад суманд 24 га талбайд мод үржүүлгийн газар байгуулж, нийт 3000 орчим га талбайд ойн зурвас, заган ойн ойжуулалт хийж, 80-90 хувийн үр дүнтэйгээр ургуулжээ.
