Манайхан ихэд нэрэлхүү зантай улс. Хэчнээн их ядарч байсан ч тэр болгон гудамжинд сандал байхгүй л бол өнцөг булан, хавтан бараадаад тухлан сууна гэж үгүй. Уг нь бусдад төвөг удахгүй л бол тэрүүхэндээ хөлөө амраачих газар мундахгүй. Үүнийг мэдэрсэн гадны нэгэн иргэн харин манайд “од” болов. Харин мань эр өөрийгөө “од” болсноо мэдээ ч үгүй яваа байх.
Сая хэсэг сошиалаар талбайн урд сааданд нүцгэн эр хэвтэж байсан зургийг үзээгүй хүн үгүй биз. Түүний чөлөөт сэтгэхүйг буруушааж, цагдаагийн ажлыг хүртэл зааж, барь хорь, хөөж туу зэргээр шаагилдах нь даан ч бүдүүлэг. Харин ч бидний амар амгаланг мэдэрсэн гэлтэй түүний энэ үйлдлийг ингэж дэврүүлж сүр бадруулах шаардлагагүй баймаар.
Дэлхийн улс орнууд, ард иргэд эко орчинг улам л их шүтэх болсон. Тиймдээ ч том, жижиг гэлтгүй цэцэрлэгт хүрээлэнгүүддээ өөрийн орон зай, орчноо бүрдүүлж, тааваараа амарч, зугаалж, сууж, хэвтэж, хооллож, тоглож, тэр ч бүү хэл унтаж, алжаал стрессээ тайлж байх жишээний. Сентрал парк, Хайд парк, Гринвич парк, Жардан дэ Люксембург гэх мэт заавал том гэлтгүй бичил цэцэрлэгт ч ийм амралт өрнөдөг. Бид ч бас заавал хол явж, гол ус бараадалгүй, хотын төвөөр алхангаа, эсвэл ажил амьдралаа зохицуулах зуураа хотынхоо ногоон байгууламждаа хаяахан ингэсгээд хөлийн чилээгээ гаргаад, нуруугаа амраагаад, нарлачихмаар л байна шүү дээ. Нэмэлт тохижилтын ч шаардлага хэрэггүй. Нэгэндээ төвөггүйхэн амарч байхад л болно. Ингээд хэвтээд эхлэхээрээ хайран ногоон хивсээ бузартуулаад, буруу харж хог хөглөрүүлээд байвал харин ямар нэмэр байх билээ. Энд миний эрх өөр хэн нэгэн хүний эрхээр хязгаарлагддаг гэдгийг санах ёстой.
Хамгийн гол нь бут бургасын наагуур цаагуур бие засах, хог, нус цэрээ хаяхгүй байх хотын наад захын соёлыг л нэн тэргүүнд өөрийн болгочих хэрэгтэй. Магадгүй Монголд “од” болсон энэ гадаад эр биднийг тэр хэмжээний соёлтой гэдэгт итгэсэндээ л ийн тухлаа биз. Бид ч гэсэн түүн шиг тухалмаар л байна. Тэр цагт саяных шиг нэгнийгээ олон нийтэд танилцуулж, ад шоо үзэж, цэрэг цагдаад шургуу хийж, цээжин дэх муу үгсээ шидэлцэхгүй л байя. Чиний, миний гэж нийтийн эзэмшлийг булаацалдах ч шаардлага байхгүй. Соёлжоод ирэхийн цагт бидэнд угаас газар огт мундахгүй. Цэвэр цэмцгэр байдлыг харин хэзээ ч мартаж болохгүй. Умартсан нэгэндээ л зөв шаардлага тавих хэрэгтэй. Эргүүлийнхэн энэ үед л жинхэнэ ажлаа үр бүтээлтэйхэн хийх хэрэгтэй юм шүү дээ.
Яг одоо бидэнд авто зам руу харсан хэдэн сандал, замын голд байгаа хэдэн модон, чулуун сандлууд л байна. Тиймээс жоохон эко байвал болохгүй гэж үү? Хатуу сандал дээр хөшиж суух бус, байгальдаа илүү ойр байхад болохгүй нь юу байгаа юм бэ?
