Малайзийн парламентын сонгууль эхлэхээс хэдхэн цагийн өмнө тус улсад бусдын гарт амь үрэгдсэн Ш.Алтантуяагийн аав Ерөнхий сайд асан Махатхир Мохамэдтэй холбогдон малайзчуудад хандан мэдэгдэл хүргүүлжээ.
Малайзийн сөрөг хүчний Пакатан Харапан буюу Итгэлийн эвсэл намын даргад хандан эрдэмтэн Сэтэвийн Шаарийбуу сонгуулийн үр дүнд малайзчууд эрх чөлөө болон шударга ёсыг олоосой гэж хүсч буйгаа илэрхийлжээ.
Malaysiakini агентлагийн мэдээлснийг орчуулан хүргэж байна. Иргэн С.Шаарийбуу мэдэгдэлдээ,
“Малайзчууд аа, сонголтоо хийхдээ Ш.Алтантуяаг санаарай. Хэрэв Малайзийн ард түмэн буруу сонголт хийвэл миний охины аллага шиг шударга бус явдалтай нүүр тулах болно” хэмээн бичсэн байна. Их сургуулийн багшаар ажиллан тэтгэвэртээ гарсан С.Шаарийбуу энэхүү мэдэгдэлдээ Малайзийн туг барьсан өөрийн гэрэл зургаа дагалдуулж, доор нь гарын үсгээ зурсан байжээ.
Охины маань төрсөн өдөр Малайзийн парламентын сонгуультай давхцаж байгаа учраас би тус улсын иргэдэд хандаж Ш.Алтантуяаг битгий мартаарай, сонголтоо ухаалгаар хийгээрэй гэж хэлмээр байна
Монголын нийслэл Улаанбаатар дахь түүний өмгөөлөгчөөр нь дамжуулан холбогдоход С.Шаарийбуу Малайзид шинэ засгийн газар байгуулагдаж, түүний Холбооны дээд шүүхийн эсрэг гаргасан иргэний заргыг нухацтайгаар авч үзээсэй гэж хүсч буйгаа илэрхийлсэн юм. Тэрээр, “Охин маань 12 жилийн өмнө амиа алдсан гэтэл одоог хүртэл энэ хэрэг шийдэгдээгүй байна. Бид хэр удаан хүлээх ёстой вэ?
Охин маань амьд сэрүүн байсан бол тавдугаар сарын 6-нд 40 нас хүрэх байлаа. Түүний төрсөн өдөр Малайзийн парламентын сонгуультай давхцаж байгаа учраас би тус улсын иргэдэд хандаж Ш.Алтантуяаг битгий мартаарай, сонголтоо ухаалгаар хийгээрэй гэж хэлмээр байна.” гэсэн юм.
Тавдугаар сарын 2-нд С.Шаарийбуугийн нэхэмжлэлээр Малайзийн засгийн газрыг тус хэрэгт яллагдагчаар татах Давж заалдах шатны шүүхийн шийдвэрийг Малайзийн Холбооны дээд шүүхээс хянах хүсэлтийг гаргасан юм. С.Шаарийбуугийн өмгөөлөгч Сангийт Каур Деогийн хэлж байгаагаар С.Шаарийбуугийн гэр бүл ирэх зургаадугаар сарын 6-наас өмнө мэдүүлэг өгөх шаардлагатай аж.
Өнгөрсөн жилийн наймдугаар сард Шах Аламын Дээд шүүхээс С.Шаарийбуугийн хүсэлтийг “үндэслэлгүй” хэмээн хүлээж аваагүй гэнэ.
Гэсэн хэдий ч гурван гишүүний бүрэлдэхүүнтэй Давж заалдах шатны шүүхийн шүүгч Мод Завави Мод Салле Дээд шүүхийн шийдвэрийг буцаан, С.Шаарийбуугийн хүсэлтийг хүлээн авчээ. Ингэснээр Малайзийн засгийн газар 100 сая ринггитийн хэрэгт буцаж татагдан орсон юм.
С.Шаарийбуу болон Ш.Алтантуяа агсны хоёр хүүхэд Б.Мөнгөншагай, М.Алтаншагай нар 2007 онд иргэний шүүхэд хандсан юм. Ш.Алтантуяаг хөнөөсөн ахлах мөрдөгч Азила Хадри, бага түрүүч Сирул Азхаар Умар нар болон Малайзийн засгийн газар тус хэрэгт яллагдагчаар татаад байна.
Ш.Алтантуяаг 2006 оны аравдугаар сард Шах Аламын ойролцоох ойд хөнөөсөн ба 2015 онд Холбооны дээд шүүхээс Азила болон Сирулыг тус хэрэгт буруутай хэмээн цаазын ял оноосон билээ. Гэсэн хэдий ч Сирул ялын тогтоол гарахаас өмнө Австрали руу оргон зайлсан юм. Тэрээр Австралийн хууль сахиулагчдад баригдан, Сидней дэх Виллавүүдийн Цагаачлалын саатуулах төвд хоригдсоор байгаа аж.
Эх сурвалж: Malaysiakini
