Автомашины худалдааг нүүлгэн шилжүүлэх тухай яригдаад багагүй цаг хугацаа өнгөрсөн ч өнөөдрийг хүртэл үр дүнд хүрээгүй, шийдлээ олж чадаагүй байгаа билээ. Вокзалын баруун талын 1000 машины зогсоолоос бусад нь хуучин бууриндаа үйл ажиллагаагаа явуулсан хэвээр байгаа юм.
Тэгвэл Баянзүрх дүүргийн Иргэдийн төлөөлөгчдийн хурлын төлөөлөгч Г.Хонгор, Б.Дэмбэрэл, П.Төмөрхуяг нар “Да хүрээ” захын ойр орчмын авто замын түгжрэлийг бууруулах, иргэдийнхээ эрүүл, аюулгүй орчинд ажиллаж, амьдрах орчин нөхцөлийг хангах зорилгоор хэд хэдэн ажлыг хийж эхлээд байгаа аж. Энэхүү ажлын хүрээнд Баянзүрх дүүргийн Замын цагдаагийн хэлтэс, “Да хүрээ” техникийн захын удирдлага мөн тус захын ойр орчимд хувиараа автомашин, техник, сэлбэг хэрэгслийн худалдаа эрхэлдэг, дугуй засвар, тос масло солих зэрэг техник үйлчилгээ үзүүлдэг нийт 190 орчим бизнес эрхлэгч болон дүүргийн Мэргэжлийн хяналт, Татварын хэлтэс, Газрын алба, Авто тээврийн үндэсний төв, Эрүүл мэндийн төв, дүүргийн Засаг даргын тамгын газар зэрэг холбогдох байгууллагуудын төлөөлөл оролцсон нэгдсэн уулзалтыг зохион байгуулахаар болжээ.
Уулзалт 2018 оны тавдугаар сарын 18-нд “Да хүрээ” захын гуравдугаар байранд болох бөгөөд энэ үеэр дүүргийн нийт оршин суугч болон “Да хүрээ” захаар үйлчлүүлэгч иргэдийн эрүүл, аюулгүй орчинд ажиллаж, амьдрах нийтлэг эрх ашиг, цаашилбал орчны агаар, хөрсний бохирдол, утаа тортог, авто замын түгжрэл зэрэг тулгамдсан олон асуудлыг хэрхэн шийдвэрлэх хүрээнд санал бодлоо солилцож, хийх ажлаа төлөвлөх юм байна. Иймд байр сууриа илэрхийлэхийг хүссэн иргэдэд энэхүү уулзалт нээлттэй гэдгийг зохион байгуулагчдын зүгээс мэдэгдлээ.
