Нийгмийн Даатгалын Ерөнхий Газар, Бүгд Найрамдах Солонгос Улсын Элчин Сайдын Яам, Цагдаагийн Ерөнхий Газар хамтран өнөөдөр мэдээлэл хийлээ.
Нийгмийн Даатгалын Ерөнхий Газраас “Жилд дунджаар 300 мянга, сард 24 мянга орчим иргэн ТҮЦ машинаас лавлагаа авдаг. 2017 онд БНСУ-ын ЭСЯ-наас манайд хандаж 890 хүний лавлагаа үнэн бодит эсэхийг шалгуулсан. Мөн 2018 онд 430 иргэний лавлагааг шалгуулж 153 лавлагааг хуурамчаар үйлдсэнийг тогтоогоод байна. Хуурамч лавлагаа гаргаж байгаатай холбогдуулан лавлагаа үнэн зөв эсэхийг шалгах системийг нэвтрүүлсэн. Ингэснээр хуурамч лавлагаа үйлдэж буй хүмүүсийн үйл ажиллагааг таслан зогсоох боломжтой болсон. Хуурамч лавлагаа гаргаж байгаа хэсэг бүлэг хүмүүс байгаа учраас Цагдаагийн байгууллагатай хамтран нэгдсэн байдлаар шалгаж эхлээд байна” гэлээ.
Өнгөрсөн дөрөвдүгээр сард 400-500 иргэн хуурамч бичиг баримт бүрдүүлжээ
Харин БНСУ-аас Монгол Улсад суугаа ЭСЯ-ны Консул Кил Кан Муг “Сүүлийн үед иргэд виз мэдүүлэхдээ бүрдүүлэн өгдөг бичиг баримтыг хуурамчаар үйлдэх тохиолдол нэлээд ихсэж байгаатай холбогдуулан НДЕГ болон ЦЕГ-тай хамтран мэдээлэл хийж байна. Солонгос руу зорчих хүсэлтэй иргэдийн дунд хуурамч бичиг баримт бүрдүүлэх зөрчил нэлээд олон гарч санаа зовоох түвшинд хүрсэн.
Иргэдийн түгээмэл хуурамчаар бүрдүүлж буй бичиг баримтыг харвал,нийгмийн даатгалын лавлагаа, гэрлэлтийн гэрчилгээ, дансны хуулга мөн хамгийн ноцтой нь Европын орнууд руу зорчсон гэх хуурамж тэмдэглэл байна. Зөвхөн өнгөрөгч дөрөвдүгээр сард л гэхэд 400-500 иргэн хуурамч бичиг баримт бүрдүүлж өгсөн байгаа. ЭСЯ-ны зүгээс хуурамч бичиг баримтаар виз мэдүүлсэн иргэдийн дахин виз мэдүүлэх эрхийг хамгийн багадаа нэг жил цаашилбал хуагцаагүйгээр хааж байгаа. Хууримч бичиг баримтыг үйлдэж өгсөн этгээдийг бол шууд хугацаагүйгээр виз мэдүүлэх эрхийг хаана.
Хууль бусаар бичиг баримт бүрдүүлж буй иргэд олон нийтийн сүлжээгээр зар тарааж, үүнийхээ хариуд иргэдээс хамгийн багадаа 100,000 цаашилбал 5 сая төгрөг хүртэл авч байна. Үүний хохирогч нь Солонгост очиж ажил, хөдөлмөр хийж амьдралаа сайжруулах хүсэлтэй жирийн залуус болж байгаа нь харамсалтай. БНСУ-ын ЭСЯ албан ёсны зөвшөөрөлтэй найман төвөөр л дамжуулан визний материал авдаг.Тиймээс тэдгээр найман төвийн зөвлөгөө мэдээлэл өгөх ажиллагааг сайжруулахаар ажиллах болно. Солонгосын виз гаргаж өгч чадна гэсэн амлалт өгч буй хувь хүн байгууллагаас болгоомжлохыг онцгойлон анхааруулж байна. Манай ЭСЯ-ны зүгээс таньдаг хүнээр дамжуулах, эсвэл хэн нэгний гуйлгаар виз олгодоггүй.
Хурамч бичиг баримт үйлдэж байгаа нь хэд хэдэн сөрөг талтай. Итгэлцэлийг эвдэж байгаа учраас бүх бичиг баримтыг нэг бүрчлэн шалгах учраас хариу удаж гарна. Нэг удаа хуурамч бичиг баримт ашигласан нь тогтоогдсон хүн зайшгүй шаардлагаар дахин Солонгос улс руу зорчих болоход виз гарахгүй” гэлээ.
Өдөр бүр мянга орчин хүн визний мэдүүлэгч байна
БНСУ-аас Монгол Улсад суугаа ЭСЯ-ны Консул Кил Кан Мугаас зарим зүйлийг тодрууллаа.
-Солонгос улс руу зорчих гэсэн хүсэлтэй иргэд хуурамч бичиг баримт ихээр бүрдүүлж өгч байна гэж байна. Ямар бичиг баримтыг хуурамчаар бүрдүүлж өгч байна вэ?
-Хамгийн их хуурамчаар ирүүлж байгаа бичиг баримт гэвэл нийгмийн даатгалын лавлагаа, дансанд байршуулсан таван сая төгрөгийн гэрээ, өөрийгөө оюутан гэсэн тодорхойлт, дүнгийн хуулбар, ажлын газрын тодорхойлтыг хуурамчаар үйлдэж байна. Мөн гадаадын орнууд зорчсон хуулбарыг хуурамчаар үйлдэж байна. Солонгос улсын элчин сайдын яаманд хуурамчаар бичиг баримт бүрдүүлсэн тохиолдолд манайхаас нэг жил болон цаашлаад тухайн иргэнийг хугацаагүйгээр виз мэдүүлэх эрхийг нь хасна. Үүнээс гадна хуурамч бичиг баримт бүрдүүлж өгч байгаа этгээдийг хугацаагүйгээр манай улсад виз мэдүүлэх эрхийг хааж байгаа гэдгийг хэлмээр байна.
-Виз мэдүүлж байгаа найман газар байгаа гэсэн. Эдгээр найман газарт хяналтыг хэрхэн тавьж байгаа вэ. Виз мэдүүлэг нэлээд удаашралтай байдаг. Энэ юунаас шалтгаалаад байна вэ?
– Албан ёсны зөвшөөрөлтэй найман төвөөр зөвлөгөө мэдээлэл өгөх ажиллагааг сайжруулахаар ажиллаж байна. Визний мэдүүлэг удааширч байгаа шалтгаан өдөр бүр мянга орчин хүн визний мэдүүлэгч байна. Эдгээр мянган хүнээс ихэнх нь ямар нэгэн байдлаар хуурамч материал бүрдүүлж ирж байгаа учраас үнийг шалгахад хугацаа их шаардаж байгаа. Иймээс энэ асуудлыг нийгмээрээ хамтарч тэмцэхгүй бол энгийн иргэд их хохирч байна. Бидний зүгээс виз мэдүүлэг дүрэм журмынхаа дагуу ажиллаж байгаа.
-Визний хугацаанд өөрчлөлт орсон уу. Нэг сар болон гурван сарын виз олгогдож байгаа юу?
-Визний хугацаа 90 хоног хэвээр байгаа. Ямар нэг хүмүүс 30 хоногийн виз олгодог болчихсон. Харин би та нарт гурван сарын виз олгож өгнө гэж хуурах асуудал гараад байгаа. Иймээс виз мэдүүлж байгаа хүмүүс анхаарах хэрэгтэй. Мөн нэг сарын хугацаатай виз олгох тохиолдол байгаа.
