Монгол улсад хоёр дахь удаагаа зохион байгуулагдаж буй Таеквондогийн азийн аварга шалгаруулах тэмцээн энэ сарын 8-13-ны өдрүүдэд болсон юм. Тэмцээний ахмадын ангилалын 54 кг-ийн жинд Цэнхэр үст хэмээх Э.Цэрэн хүч үзэхээр болсон тухай бид өмнө нь мэдээлсэн.
Тэгвэл Цэнхэр үст тамирчин тэмцээндээ оролцож, бас ч үгүй чамлахааргүй амжилт гаргаж, хүрэл медаль хүртжээ. Түүний өрсөлдөгчдийн нэг болох н.Манлай нь 27 жил энэ спортоор хичээллэсэн тамирчин юм байна. Э.Цэрэн түүнтэй хүч үзээд “Би арай гэж л амьд гарлаа” хэмээжээ.
Тэрээр тэмцээнийхээ тухай “Амьдралдаа анх удаагаа шагнал авав. Будхүү багшийн ширүүн гараар жаахан нухлуулав… Намайг хөлөн дээрээ сайн ажилласангүй гэж их зэмлэсэн. Завханаас 6 шавьтайгаа ирсэн. Намайг тэмцээнд орно гэж шийдэхэд нөхөр маань хамгийн их бахархсан… Чи орно гэж зориглож байгаа чинь л гайхалтай гэж духан дээр үнссэн. Хоёр хүү айхтар ойшоогоогүй ээ. Өнгөрдөг шөнө ерөөсөө унтаж чадаагүй… Өнөөдөр их ядруу байв. Хөлний техник илтэд сул байсан. Гар илүү ажилладгийг мэдсэн өрсөлдөгч завсар зайгүй хөлөөрөө тоглоод ойртуулаагүй. Унтсан ч миний техник сул талдаа байв.” гэсэн юм.
Ямартай ч ахмад тамирчин маань Азийн аваргын хүрэл медальтан болсон байна. Зарим нэг нь “Ээ дээ Цэнцэрэн минь гахай авчих болов уу гэж айж байлаа” хэмээн хошигнож харагдав.
Э.Цэрэн нь Монголын таеквондогийн холбооны удирдах зөвлөлд шинээр сонгогдон ажиллаж эхэлсэн аж. Түүний хувьд монголын хүүхэд залуусыг эрүүл чийрэг, өв тэгш хүмүүжилтэй, авхаалж самбаатай өсөн торниход уриалах үүднээс олон улсын монголын таеквондогийн холбооны удирдах зөвлөлд орсон хэмээн мэдэгдэж байсан юм. Түүнчлэн удирдаад зааварлаад суулгүй өөрийн биеэр үлгэрлэн, өөрийн нас чадлыг гололгүй бие хамгаалах урлагаар хичээллэж байгаа юм байна.
