“Эрдэнэс Тавантолгой” ХК дэргэдээ “1072 хувьцаа” мэдээллийн төв нээжээ. Иргэдэд хувьцааны талаар мэдээлл өгөх, ЭТТ өөрөө ил тод, шилэн байх зорилгоор энэхүү төвийг нээж байгаа талаар тус компанийн гүйцэтгэх захирал Б.Ганхуяг нээлтийн ажиллагааны үеэр онцоллоо.
Мөн тэрээр ““1072 хувьцаа” мэдээллийн төв нь Хөрөнгийн бирж, Санхүүгийн зохицуулах хороотой хамтран Засгийн газар, УИХ-аас гарсан тогтоолуудтай холбоотой мэдээллийг өгөх зорилготой. Мөн компанийн үйл ажиллагааг ил тод, нээлттэй, хүнд сурталгүй болгох, энэ хүрээнд компанитай холбоотой өдөр тутмын мэдээллийг өгөх зорилготой. Өнөөдрийн байдлаар ЭТТ компани нь 15.3 сая куб.м хөрс шилжүүлж, 2.9 сая тн нүүрс олборлоод бэлэн болгожээ. 5.1 сая тн нүүрс борлуулсан байна. 710 тэрбум төгрөгийн орлого олж, 2018 оны төсөвт нийт 1.2 ихнаяд төгрөгийн борлуулалт хийнэ гэсэн төлөвлөгөөтэй байсан бол энэ байдлаар оны эцэс гэхэд 1.5 ихнаядаас дээш төгрөгийн орлоготой байх боломж харагдаж байна. Өмнөх 2017 онд 461 тэрбум төгрөгийн цэвэр ашигтай байсан бол энэ жил 700 орчим тэрбум төгрөгийн цэвэр ашигтай байх магадлал байна. Ингэвэл нэг хүнд ногдох ногдол ашиг, төр болон бусад хувьцаа эзэмшигчдийн ногдол ашгийн хэмжээ нэмэгдэх юм.” гэлээ.
Брокер, диллерийн компаниуд тус төвийн дэргэд мөн ажиллах юм байна. Нийслэлийн бүх дүүргийн хороод, 21 аймгийн 336 сум буюу засаг захиргааны бүх анхан шатны нэгжүүдээр ард иргэдэд мэдээлэл хүргэх тул харьяа хороо, сумдаас мэдээллээ авах боломжтой. Нэг үгээр бол уг мэдээллийн төв дээр компани болон хувьцаатай холбоотой бүх асуудлыг шийдвэрлэх юм байна.
Тус компанийн тухайд, ЭТТ ХК нь гадаад, дотоод бүх өрөө төлсөн бөгөөд одоо IPO гаргах ёстой аж. ЭТТ нь энэ жил түүхэндээ анх удаа хамгийн өндөр ашигтай ажилласан байна. Улмаар 46 тэрбум төгрөгийн ашигтай ажилласан ба үүнийг бүх хувьцаа эзэмшигчиддээ хуваавал нэг хүнд 3000 төгрөг оногдохоор байгаа аж. Гэхдээ ТУЗ-ийн хурлаар хэлэлцээад энэ жил ашгаа үр ашигтай зүйлд зарцуулж, ирэх жилээс ногдол ашгийг нэмэгдүүлэхээр ярилцаж шийдвэрлэжээ.
Мөн Ерөнхий сайдаас өгсөн үүрэг даалгаварын дагуу тээврийн компаниудтай тээврийн хариуцлагын гэрээ байгуулж эхэлсэн талаар энэ үеэр дурдлаа. ЭТТ компаниас нүүрс худалдаж авч байгаа тал нь зөвхөн ЭТТ-той хариуцлагын гэрээ байгуулсан компаниудтай хамтарч ажиллах аж. Мөн тээврийн жолооч нарт зориулсан амралт, үйлчилгээний хоёр зогсоол буюу төвийг байгуулах зэргээр үүргээ биелүүлж байгаа юм байна.
Нэг хэсэг учир дутагталтай ажиллаж байсан шилэн дансны харилцаагаа өнөөдрөөс тодорхой болгож байгаа гэж байна. 5 саяаас дээш төгрөгийн зардлыг шилэн дансанд байршуулах ёстой байдаг. Ард түмний компани гэдэг утгаараа үүргээ ийнхүү хэрэгжүүлэх болжээ.
Иргэдээс ихэвчлэн ирдэг асуултад хариулт өгөхөд, оюутнууд болон ахмадууд гэх мэт хувьцаагаа зарсан иргэд арилжаа эхлэснээс хойш бэлэн мөнгөөр хувьцаа дахин худалдаж авч болно гэсэн мэдээллийг албаныхан өглөө. Одоогоор нэгж хувьцааны нэрлэсэн үнэ 933 төгрөг байгаа боловч арилжаа эхлэхээр хувьцааны үнэ өсөх, буурах нь эрэлт нийлүүлэлтээр зохицуулагдаад явах юм.
“1072 хувьцаа” мэдээллийн төв нь Эрдэнэс Тавантолгой ХК-ийн II байрны 106 тоотод байрлаж байна. Тодруулбал, Хангарьд ордны баруун талд МОНЦАМЭ агентлагийн урд талын хоёр давхар цагаан байшинд иргэдэд үйлчлэх юм. Энэхүү төв нь ажлын өдрүүдэд 08:30-17:30 цагийн хуваариар ажиллана. Тус төвийн дэргэд тусгай дугаар болох 1800-1072 утсыг нээлттэй ажиллуулж байна. Брокер диллерийн пүүсүүд 108 тоотод бүртгэл хийж байгаа юм.
ЭТТ компани нь есдүгээр сарын 1-ний өдрөөс Монголын хөрөнгийн биржийн бүртгэлд гарч, 2019 оноос 1072 хувьцаа эзэмшигчиддээ ногдол ашгаа олгоно. Хөрөнгийн биржийн арилжаа нээгдтэл хувьцаагаа зарах боломжгүй гэдгийг тус төвийн мэргэжилтнүүд тайлбарлалаа.
Ийнхүү 1072 хувьцаа амилах, хувьцааны ашиг тараах цаг ойртож буйн дохио хангиналаа.
Дашрамд сануулахад, ЭТТ компанийн ТУЗ-ийн ээлжит хурлаар зохион байгуулалтын асуудал хэлэлцэж, тус компанийн гүйцэтгэх захирлаар Б.Ганхуягийг, Тэргүүн дэд захирлаар Б.Жаргалсайхан нарыг тус тус томилсон билээ.
