Завхан аймгийн Орон нутгийг судлах музейд хадгалж байгаа Шүрэн улаан Жамсран бурхны баг нь Монголд хоёрхон байдаг төдийгүй түүхийн ховор үзмэр ажээ. Харин нөгөөх нь Чойжин ламын сүм музейд Монгол Улсын хосгүй үнэт өв болох шүрэн баг, иж бүрэн өмсгөлийн хамт хадгалагддаг байна.
Тус үзмэр нь Завхан аймгийн Их-Уул сумын нутаг дахь Хуягтын хүрээнд хэрэглэж байсан 10 догшин хангалын нэг юм. Хийц ур нь цаас, улаан шүр, будаг оролцуулан хөөмөлдөж бүтээсэн. Будааны хэмжээтэй жижиг улаан шүрийг утсанд хэлхэж нүүрний хэсэгт нааж тогтоожээ. Маш уран нарийн хийцтэй шашны томоохон үнэт бүтээл юм. 1956 онд анх музейд ирж одоог хүртэл түмэн олны нүдийг хужирлаж байгаа юм байна. Монгол улсын хэмжээнд ховор бүтээлд ордог XYIII зууны сүүл үеийн шашны бүтээл юм. Энэхүү бүтээлийг ид шидтэй гэж ярих нь ч бий. Учир нь музейн гол үзмэр болсон уг багт хүн аминчлан сүслэн залбирвал үйлс нь бүтдэг хэмээн нутгийнхан одоо ч ярьдаг ажээ. Харин хоёр дахь шүрэн баг буюу Чойжин ламын сүм музейд хадгалагпах шүрэн багийг нь XIX зууны үед хүрээний алдарт барималч Пунцаг-Осор цаасан шуумлын аргаар урлаж, алт, мөнгө, шүр, сувд, оюу, номин зэрэг эрднэсийн чулуугаар чимэглэжээ. Улаан Жамсрангийн цамын багийг бүтээхдээ бурхны хилэнт дүр төрхийг 6000 гаруй цэвэр улаан шүрээр чамин хийцээр шигтгэж урласан байна. Цамын баг нь дангаараа 30 кг жинтэй бөгөөд өмсгөлтэйгөө нийлээд 70 кг жинтэй аж. Улаан Жамсран бурхны өмсгөлд шүрэн баг, дээл, жавдар, хиур, рүжин буюу ясан чимэг, мядаг буюу хормогч, цээживч, тэтэжад буюу Жамсран бурхны дагуул нөхдийн шүр, үлбэн чимэглэлтэй цаасан шуумал цамын баг зэрэг 18 зүйл багтдаг байна. Улаан Жамсран бурхны шүрэн багийг Монгол улсын Засгийн газрын 1995 оны 241 тоот тогтоолоор хосгүй үнэт өвд бүртгэжээ. Харин 2013 онд Монгол Улсын Засгийн газрын 227 тоот тогтоолоор бүрэн өмсгөлийг нь хосгүй үнэт өвд бүртгэсэн байна.
