Майкл Ротондо гэгч америк залууг төрсөн эцэг эх нь бие даан ажил хийлгэж, амьдруулахийн тулд ятгаад дийлээгүйн учир эцэст нь шүүхэд өгчээ. Түүний эцэг эх болох Кристина болон Марк Ротондо нар сүүлийн хэдэн сарын хугацаанд хүүгээ явуулах гэж оролдоод бүтээгүй тул ийнхүү шүүхэд хандсан нь энэ ажээ. Тэд хүүгээ гэрээсээ явуулахын тулд Нью-Йорк хотын Сиракуз дүүргийн Онондага тойргын Дээд шүүхэд хандсан бөгөөд өмнө нь тэд хоёрдугаар сард хүүгээ нүүхийг шаардсан захиа илгээж байсан байна. Уг захидалд “Ажлын туршлагагүй чам шиг хүнд ч таарах ажил байгаа. Чи заавал ямар нэгэн ажил олж хийх ёстой” гэж бичсэн байжээ.
Тэд мөн хүүдээ 1100 ам.доллар бэлнээр өгч, амьдрах байраа олохыг гуйжээ. Түүний эцэг эхийнх нь мэдүүлснээр тэдний хүү байрны мөнгө огт төлдөггүйн дээр мөн тэдэнд ямар ч тусламж үзүүлдэггүй бас гэр орны амьдралд огт оролцдоггүй нэгэн гэнэ. Харин тэдний хүү Майкл шүүхэд мэдүүлэхдээ өөрийгөө захидал авснаас хойш 6 сарын хугацаанд амьдрах эрхтэй гэж маргасан бөгөөд гэвч шүүгч түүний үгийг нь огт хүлээж аваагүй байна.
Одоо Майкл шүүхийн шийдвэр болон хууль хүчний шахалтаар төрсөн гэрээ орхиж, бие даасан амьдралд шилжихээр болж байгаа ажээ.
