Бялуу урлалыг урлаг болгон хөгжүүлж, урлаачдын уран чадварыг сорьдог олон улсын уралдаанд М.Наранчимэгийн бүтээл тэргүүлжээ. Тэрээр Англи улсад зохиогдсон олон улсын бялуу урлаачдын “GATSBY” сэдэвт уралдааны “SWEET EASY” төрөлд оролцож нэгдүгээр байр эзэлсэн байна. Уг тэмцээнд дэлхийн 62 орны амттан урлаачид оролцсон аж.
Тэрбээр өмнө нь АНУ-д болсон ICES буюу “International cake exploration societe” гэх 40 дэх удаагийн уулзалт, шоунд эх орноо төлөөлөн оролцож гуравдугаар байрын шагнал хүртэж байсан билээ. М.Наранчимэг өмнө нь манай сайтад ярилцлага өгөхдөө “Миний ээж нарийн боов хийдэг хүн байлаа. Ширээ сайхан засдаг, гэрийн сайн эзэгтэй байсан. Эмээ, ээж хоёр маань нарийн боов хийдэг тогооч мэргэжилтэй. Ээж маань Дархан хотын дөрөвдүгээр цэцэрлэгийн тогооч байсан. Ээжийнхээ үргэлжлэл болж “Саран” гэх тодотголтой бялууг урлаж хэн нэгний баярын ширээг чимж яваадаа маш их баяртай байдаг юм” хэмээн ярьж байлаа.
