“Загийн гол” хөдөлгөөн, “Дэлхийн Монгол Ногоон нэгдэл”, “Ардын заргын товчоо” ТББ-аас Баянхонгор аймгийн Заг суманд алт олборлох үйл ажиллагаа явуулж байгаа “Централ Эшиа Майнинг” компанитай холбоотой асуудлаар өнөөдөр мэдээлэл хийлээ. Баянхонгор аймгийн Заг сумын Баянбулаг багийн Их булагт “Централ Эшиа Майнинг” компани 411 га талбайд ашигт малтмалын MV-12197 тоот тусгай зөвшөөрөл авч, алт олборлохоор үйл ажиллагаа явуулж эхэлжээ. Үүнийг эсэргүүцсэн нутгийн иргэд хоёр жилийн турш тус компаний эсрэг тэмцсээр өнөөдрийг хүрсэн байна.
“Ардын заргын товчоо” ТББ-ын Удирдах зөвлөлийн гишүүн С.Зоригтбаатарын хэлснээр “Централ Эшиа Майнинг” компани нь Худалдаа хөгжлийн банкны ТУЗ-ийн дарга “сахал” Д.Эрдэнэбилэгийнх гэнэ. Тэрээр “Монголын тэргүүн баян Д.Эрдэнэбилэг гэгддэг энэ эрхэм уг нь Баянхонгорын хүн юм билээ. Түүний эзэмшлийн “Централ Эшиа Майнинг” компани Байдгийн голын эхийг ухсанаас ус нь татарч ширгэхдээ тулаад байна. Одоо болохоор түүнээс 20 км-ийн зайтай Загийн голын эхийг ухах гэж байна. Тиймээс “Д.Эрдэнэбилэг та нутгаа битгий ухаач ээ, уул усаа хайрлаач ээ, өвөг дээдсийнхээ булш, бунхан, хиргэсүүр орсон газрыг тайван орхиоч ээ гэж гуймаар байна. Хэрвээ танд мөнгө хэрэгтэй байгаа бол нутгийн иргэд насаар чинь идэх хонь, малаар хангая. Яасан их шунал вэ. Эрдэнэт”-ийн 49 хувийг авсан. Сүхбаатарын талбайн талыг нь эзэмшдэг. Хүн чанар заагаач” гэв.
Харин Заг сумын ИТХ-ын дарга Т.Нямжаргал “Централ Эшиа Манинг” уул уурхайн компани 2016 оны хоёрдугаар сард манай нутагт үйл ажиллагаа явуулахаар ирсэн. Анх 411 га газар дээр ашигт малтмал олборлоно гэсэн зураг төсөл гаргасан байсан юм. Гэтэл тэр нь “Урт нэртэй хуульд” багтаад байсан тул 105.6 га газрыг нь хасалт хийлгэсэн. Бид Засгийн газрын бодлого шийдвэрийг биелүүлж ажилладаг. Дээрээс ирсэн тушаалыг ард түмэндээ зөв зүйтэй таниулах үүрэгтэй. Гэсэн хэдий ч манай багийн ард түмэн үүний эсрэг байна. Бид ч мөн тэдний төлөөлөл болж, тэдний сонголтоор сонгогдсон хүмүүс. Тиймээс иргэдээ дэмжин, уул уурхайн компани оруулахгүй гэсэн байр суурьтай байна.
Заг сум бол Баянхонгор аймгийн хамгийн бага газар нутагтай хэсэг. XIII зууны үеийн булш, бунхан ихтэй газар нутгийг хамардаг. Ийм газарт алт олборлохоор зэхэж байгаа нь Соёлын өвийн тухай хуулиас эхлээд олон хуулийг зөрчиж байгаа. Арга барсандаа алт олборлох гэж байгаа компанийнханд малаа өгье гэж байгаа юм. Бид уух устайгаа үлдмээр байна. “Алт-2” хөтөлбөрт хамрагдсан учраас ухаж болно гэсэн байна лээ. Тийм байж болохгүй” гэсэн юм.
Тэдний хэлж байгаагаар Засгийн газрын 2016-2020 оны үйл ажиллагааны хөтөлбөрийг хэрэгжүүлэх, эдийн засгийг сэргээх зорилгоор “Алт-2” хөтөлбөр хэрэгжиж эхэлснээс олон аймаг суманд сөрөг үр дагавар авчирсан ажээ. Учир нь, тусгай зөвшөөрөлтэй гэх нэрийн дор малчид биднийг өвөлжөө бууцгүй, малын бэлчээргүй, уух усгүй болгон газар орныг минь сэндийчхээр болсон гэлээ.
