Бензин, дизель түлшний үнэ өссөнтэй холбогдуулж өнөөдөр Зам тээврийн зөвлөлөөс хэвлэлийн бага хурал хийлээ. Тэд энэ үеэр Монгол Улсын Засгийн газар болон Монгол Ардын Намд шаардлага хүргүүлж байгаагаа мэдэгдэв.
Хуралд ирсэн төлөөлөгчид иргэдийн шаардлагын дагуу ийнхүү Засгийн газар, МАН-д хандах болсноо тодотголоо.
Мэдээллийн эхэнд шатахууны үнэ шалтгаангүй өсч байгаа нь иргэдэд маш том дарамт болж байгааг дурьдаад 2018 онд шатахууны үнэ гурван удаа нэмэгдүүлснийг сануулав. Нэгдүгээр сарын 17-нд /хиймэл хомсдол үүсгэсэн/, хоёрдугаар сарын 13-нд, мөн одоо хөлбөмбөг, наадам, амралттай холбогдуулаад дахин нэмж байна гэж тайлбарлав. Нэгдүгээр сарын 17-ноос долдугаар сарын 4-ний байдлаар А80, А92, А95, Дизель түлшийн үнийг судлан нэгтгэж статистик дүн гаргасан байна.
Энэхүү 20 хувийн нэмэгдлээс шалтгаалан тээвэрлэлтийн үнэ нэмэгдэх болсон талаар мөн мэдээллээ. Тухайлбал, нийгмийн захиалгат тээвэрлэлт болох хот хоорондын зорчих тээврийн үйлчилгээний үнэ тарифыг долдугаар сарын 10-наас эхлэн 21 аймаг, алслагдсан гурван дүүрэг, 96 сум суурин луу 2000-12000 төгрөгөөр нэмэхээр аж ахуйн нэгж байгууллага, Зам тээврийн яам, холбогдох байгууллагуудад тээвэрлэгч ААН байгууллагууд мэдэгдлээ өгсөн байна. Товчхондоо бүх чиглэлд үнээ нэмэхээр болжээ.
Мэргэшсэн инженер Ж.Энхбат энэ талаар цааш ярихдаа “Улаанбаатар хотын төвлөрсөн гурван цэгт захиалгат орон нутгийн ачаа тээвэрлэлтийн үйлчилгээ гүйцэтгэдэг. Үндсэн гурван чиглэлд ачаа тээвэрлэлтийн үнийг нэмэхээр болсон. Жишээ нь, 1 кг ачааг төвийн аймгууд руу 500-800 төгрөгөөр ачдаг байсан бол одоо 1000 төгрөгөөр ачихаар болж байна. Зүүн аймгуудын чиглэлд 1 кг ачааг 800 төгрөгөөр ачдаг байсан бол 1500 төгрөгөөр ачна. Баруун аймаг буюу алслагдсан аймгууд руу 1 кг ачааг 1200 төгрөгөөр ачиж байсан бол 1600-2000 төгрөгөөр ачих болно. Энэхүү нэмэгдэл ялангуяа бичил бизнес эрхлэгчид маш ноцтой нөлөөлнө. Тэгэхээр иргэдийн нуруун дээр маш том ачаа, хүндрэл үүсч байна.
Бидний хэвлэлийн хурлын гол зорилго нь эрх баригчид өмнө нь хэрэгжиж байсан “Үнэ тогтворжуулах хөтөлбөр”-өө хэрэгжүүлээд, нам эвсэл гэж харгалзахгүйгээр төрийн залгамж халаа ёсоор яваач ээ. Иргэдийн нуруун дээр ийм хүнд ачаа битгий үрүүлээч ээ гэж хэлэхийг хүсч байна.” гэж хэлээд шатахууны үнийг яаралтай буулгаж, үнэ тогтворжуулах хөтөлбөрөө хэрэгжүүлэхийг уриаллаа.
Мөн автомашин эрхлэгчдийн зүгээс энэ 20 хувийн өсөлт иргэдийн амьдралд хэрхэн нөлөөлж байгаа талаар тодорхой тайлбар хэлсэн юм. Тодруулбал, “…үнийн өсөлтөөс болж долоо хоногт нэг тээврийн хэрэгсэл эзэмшигч хүний халааснаас нэмж хамгийн багадаа 12500 төгрөг, сард 50 мянган төгрөг гарч байна. Үүнийг жилээр тооцохоор 600 мянган төгрөг болно. Тэгвэл Монголд байгаа ойролцоогоор 1 сая орчим тээврийн хэрэгслээр тооцвол 600 тэрбум орчим төгрөгийг үнийн өөрчлөлтөөр олж байна. МАН-ынхан 60 тэрбум төгрөгөөр албан тушаалаа худалддаг гэж ярьж байсан бол одоо 600 тэрбум төгрөгийг шатахууны үнийн өсөлтөөр ард түмнийхээ халааснаас авч байна.” гэсэн юм.
Түүнчлэн өрхийн амьжиргааны түвшинд нөлөөлж байгааг дурьдлаа. Ингэхдээ ногооны үнэ огцом өсч, махаа идэж чадахаа байсан Монголчууд ногоогоо идэж чадахаа больсон гэв. Энэ үеэр хуурамч бензиний асуудлыг бас хөндлөө. Онгоц жилд 20 сая тонн шатахуун хэрэглэдэг аж. Гаалийн мэдээлэлд харин 120 сая тонн орж ирсэн гэжээ. Тэгэхээр 100 мянган тонныг нь химийн бодис нэмээд хуурамч шатахуун үүсгээд жижиглэнгээр борлуулж байгаа юм биш биз гэсэн хардлагатай байгаагаа илэрхийлж байлаа.
Эдгээр асуудлуудтай холбоотойгоор тус зөвлөлөөс дараах шаардлагыг хүргүүлж байгаа юм байна.
Шаардлагад:
1/ Бүх нутаг дэвсгэрт борлуулж буй бүх төрлийн шатахууны үнийг нэн яаралтай хямдруулах
2/ МАН 2016 оны мөрийн хөтөлбөртөө тусгасан бензин, нефть, түлшний үнийг дэлхийн зах зээлийн үнийг дагаж хямдруулахын зэрэгцээ улс даяар нэг ижил үнэтэй байлгана гэсэн амлалтаа биелүүлэх гэсэн үндсэн хоёр зүйлийг тусгажээ.
Монгол Улсад өнөөдөр 956 мянган тээврийн хэрэгсэл байна. Улаанбаатарт татвар төлснөөр 637 мянган тээврийн хэрэгсэл бий. Энэ нь айл бүрт нэг, хүн амын хоёр хүн тутмын нэг нь тээврийн хэрэгсэлтэй гэсэн үг аж.
Ийнхүү Зам тээврийн зөвлөл энэ сарын 9-нд 12:30, 18.30 цагт Сүхбаатарын талбайн өмнөх төв зам дээр нэг минутын турш өөрсдийн машины дуут дохиог дуугаргаж, шатахууны үнийг бууруулах шаардлагад нэгдэхийг уриаллаа.
