Ойрын өдрүүдэд хур бороо ихтэй, орон нутгуудад үер бууж, голуудын усны түвшин эрс нэмэгдэж байгаа энэ үед ард иргэд сонор сэрэмжтэй, ялангуяа голын ойролцоо аялж зугаалахгүй байхыг анхааруулж байна. Голын болон үерийн усанд хүний амь эрсдэх явдал өдөр бүр гарсаар байна. Тухайлбал,
Булган аймгийн Хутаг-Өндөр сумын Хутаг багийн “Гуртын гүүр” гэдэг газар буюу сумын төвөөс зүүн зүгт 7 км-т Сэлэнгэ голын усанд Орхон аймгийн Баян-Өндөр сумын харьяат 25 настай иргэн Б /эрэгтэй/ осолджээ. Энэ талаар энэ сарын 11-ний 07:19 цагт мэдэгдсэний дагуу тус аймгийн Онцгой байдлын газрын алба хаагчид ар гэрийн 19 хүний хамт нийт 30 хүн хоёр бүлэг болон хуваагдаж эрлийн ажиллагааг зохион байгуулж байгаа аж. 1 дүгээр бүлэг нь Хутаг-Өндөр сумын Хутаг багийн “Хар-Усны тохой” гэдэг газраас тус багийн “Цагаан булан” гэдэг газар хүртэл 18 км-т хоёр удаа гүний шумбалт хийж, 2 дугаар бүлэг Бугат сумын Баянтөгөл багийн “Ангийн-Отог” гэдэг газраас Сэлэнгэ сумын Таримал багийн “Ацаг” гэдэг газар хүртэл 30 км-т эрэн хайх ажиллагааг тус тус зохион байгуулсан боловч үр дүнд хүрээгүй тул өчигдөр буюу 16-ны өдрийн 20:40 цагт түр зогсоосон байна. Улмаар өнөөдөр өглөө 08:00 цагт эрэн хайх ажиллагааг дахин эхлүүлжээ.
Мөн Төв аймгийн Мөнгөнморьт сумын Байдлаг багийн “Их гутай” гэдэг газар /сумын төвөөс зүүн зүгт 30 км-т/ Хэрлэн голын усанд нийслэлийн Багануур дүүргийн харьяат 57 настай иргэн Ж /эрэгтэй/ энэ сарын 13-ны өдрийн 11:00 цагийн орчим согтууруулах ундаа хэрэглэсэн үедээ живсэн байж болзошгүй тухай дуудлага Онцгой байдлын газарт иржээ. Дуудлагыг 14-ний өдрийн 17:21 цагт хүлээн авсан ба тус аймгийн Онцгой байдлын газрын алба хаагчид тус сумын Цагдаагийн хэсгийн алба хаагч болон ар гэрийнхний хамт нийт 21 хүн эрлийн ажиллагааг эхлүүлжээ. 16-ны өдрийн байдлаар Сөвдөгийн гармаас “Улаан-Эрэг” гэдэг газар хүртэл нийт 53 км-т эрэн хайх ажиллагааг зохион байгуулсан боловч үр дүнд хүрээгүй тул 21:30 цагт түр зогсоосон аж. Харин өнөөдөр өглөө 06:00 цагт эрлийг дахин эхлүүлжээ.
Түүнчлэн Өмнөговь аймгийн Цогтцэций сумаас Билгэх багийн “Гашуун-Ус” гэдэг газар 11 настай хүү Г нь өчигдөр буюу энэ сарын 16-ны өдрийн 21:00 цагийн орчим малдаа яваад сураггүй болсон байна. Энэ талаар 17-ны 01:20 цагт мэдэгдсэнээр тус аймгийн Онцгой байдлын газрын алба хаагчид орон нутгийн иргэдийн хамт эрэн хайх ажиллагааг зохион байгуулж байгаа юм байна.
