УИХ-ын гишүүн асан Ц.Оюунгэрэл “Зүлэгтэй сельфи эхлүүлмээр санагдчихлаа. Хот, суурингийнхаа зүлэгтэй сельфидцгээе.” гэнэ. Энэ давалгаанд оролцох метрополис болсон хотын иргэдэд хотын ногоон зүлэг, алаг цэцэгс, ер ногоон байгууламж хэр хүрэлцээтэй байх бол? Амарч тухлах ногоон байгууламж алга гээд л ам амандаа бувтнацгаадаг шүү дээ манайхан.
Нийслэлийн ногоон байгууламж зарим дүүргийн хороодод, ялангуяа ханш өндөрхөн хотхонуудад хангалттай өнгө нэмэн буй биз. Гэвч нийслэлийн 70 гаруй хувийг гэр хороолол эзэлдэг гээд бодохоор тэнд оршин суугчид тансаг хотхоныг бараадах, эсвэл хаа нэг таарах цэцэрлэгт гудамжийг зорих хэрэг гарах нь. Гэхдээ тийм ч элбэг билүү. Мэдээж зүгээр ногоон өнгө бараадуулах төдийд харуулах нь сонин биш л байх. Бас нэгнийхээ харуулсан газрыг дахин гайхуулаад нэмэргүй биз.
Хэчнээн бороо хур элбэг, зуншлага сайхан, байгаль өнгөө зассан байгаа ч хотын гудамжинд жил бүр хийгддэг дэд бүтцийн засвар, шинэчлэлээс болж багагүй газар үхжиж хар шороогоор тургих болсон. Заримыг нь ногоо ургахгүйгээс хойш гээд дөрвөлжин нүхтэй бетоноор нам дарчихсан.
Тиймээс үүний оронд хэн хаана ямар зүлэг ногоо тарьж, ногоон байгууламжид хушуу биш хуруу нэмсэн бэ гэсэн өдөөн хатгалгаар давалгаалуулбал илүү ашигтай, сонирхолтой болж мэдэх юм гэдгийг эрхэм хатагтайд санал болгоё гэсэн юм. Жишээ нь, хотынхоо нэг ч гэсэн үхжиж буй мод, бутыг усаллаа, багахан газарт ч гэсэн ингэж цэцэг тарилаа гэх мэтээр гайхуулж яагаад болохгүй гэж?
