УИХ-ын гишүүн О.Баасанхүү “Эрдэнэт”-ийн асуудлаар өчигдөр мэдээлэл хийсэн юм. Тэрээр “Эрдэнэт”-ийн 49, 51 хувийн асуудлыг хөндөж, мөн үүнтэй холбоотойгоор Ерөнхий сайд У.Хүрэлсүхэд асуулга тавив.
Энэ үеэр тэрээр “Эрдэнэт”-ийн 49 хувийн асуудлыг хуулийн байгууллага шаардаж байгаа юм билээ. Харин 51 хувийг Өмнөд Африкийн Стандарт банкинд барьцаалж зээл авсан асуудлаар УИХ дахь АН-ын бүлгийн дарга Д.Эрдэнэбат хүсэлт тавьсан байдаг. “Эрдэнэт”-ийн 51 хувиаа алдсан эсэх талаар шалгалт явуулах ажлын хэсгийг УИХ-ын даргын захирамжаар байгуулсан. Чуулганы хаалтын хуралдаанд миний бие ажлын хэсгийн үр дүн ямар байгаа талаар асуулт тавьсан. Тухайн хурал дээр ажлын хэсгийн ахлагч Я.Санжмятав “Арбитрын шүүх долдугаар сарын 6-нд Лондонд болох гэж байгаа. Энэ хуралд УИХ-ын гишүүн Т.Аюурсайхан нар оролцоно. Манайд нааштайгаар шийдгэдэх байх” гэж мэдэгдсэн. Үүнээс хойш наймдугаар сар гарлаа. Тиймээс би Ерөнхий сайд У.Хүрэлсүхэд асуулга тавьж байгаа юм.
-Энэ асуудал Арбитрын шүүхэд бүрэн эцэслэгдсэн эсэх, өнөөгийн байдлаар ямар үр дүн гарсан.
-Арбитрын шүүхээс ямар шийдвэр гаргасан.
-Эрдэнэт үйлдвэрийг өрөнд оруулсан этгээдүүдэд ямар арга хэмжээ авах, хохиролгүй болгох талаар юу хийж байгаа вэ?
-Эрдэнэт үйлдвэрийг хохиролгүй болгох талаар нарийвчилсан төлөвлөгөө боловсруулсан эсэхийг асууж байна.
Надад ирсэн албан бус мэдээллээр долдугаар сарын 10-нд шүүх хурал болж, Монголын талд хүнд шийдвэр гаргасан гэсэн. Хэрвээ энэ шүүх хурлын шийдвэрийг биелүүлэхгүй бол “Эрдэнэт”-ийн удирдлагуудыг баривчлах, эд хөрөнгийг нь хураах асуудал яригдаж байгаа юм байна. Ээлжит бус чуулган хуралдвал “Эрдэнэт”-ийн асуудлыг яаралтай хэлэлцэх хэрэгтэй” хэмээлээ.
Мөн О.Баасанхүү гишүүн ард түмэнд бодит үнэнийг яаралтай мэдээлэхийг Ерөнхий сайд У.Хүрэлсүхээс шаардлаа.
