Оросын иргэншил аваад удаагүй байгаа Америкийн нэрт кино жүжигчин Стивен Сигал тус улсын ГХЯ-ны албан ёсны ажилтан болжээ. Түүнийг ОХУ-ын ГХЯ-ны Орос, Америкийн хүмүүнлэгийн салбарын харилцааны тусгай төлөөлөгчөөр томилсон болохыг Оросын ГХЯ-аас албан ёсоор зарласан байна. Оросын ГХЯ-ны мэдэгдэлд “Стивен Сигал ОХУ, АНУ-ын хоорондын хүмүүнлэгийн салбарын хөгжил, хамтын ажиллагааг эрчимжүүлэх тал дээр ажиллах болно. Мөн тэрээр хоёр улсын соёл урлаг, нийгэм, залуучуудын хамтын ажиллагааг хариуцана” хэмээн дурджээ. ОХУ-ын ГХЯ-ны фейсбүүк хуудсан дээр мэдээлснээр Стивен Сигал нь Оросын ГХЯ-нд ажилласнаар ямар нэг цалин урамшуулал огт авахгүй юм байна. 2016 онд ОХУ-ын Ерөнхийлөгч Владимир Путин түүнийг тус улсын иргэн болгох зарлигт гарын үсэг зурсан бөгөөд тэрээр мөн АНУ болон ОХУ, Сербийн давхар иргэншилтэй ажээ.
